WA NAY mahitabong mga misa atol sa kapistahan sa Holy Infant of Jesus of Prague sa Shrine Hill, Matina, Davao City aron nga malikayan ang pagdasok sa mga tawo sa Biyernes, Enero 15, 2021.
Kini human nga nagkasabot ang tagdumala sa shrine ug ang lokal nga panggamhanan tungod sa padayong hulga sa coronavirus disease 2019 (Covid-19).
Ang kanselasyon sa mga kalihukan gikompirma mismo ni Public Safety and Security Command Center (PSSCC) head Angel Sumagaysay pinaagi sa text message ngadto sa SunStar Davao Myerkules sa hapon, Enero 13.
"Yes cancelled na. Nag-usap na kami ng shrine management at yung owner kay nihangyo ta nga kung pwede wala nay masses nga himuon karong January 15, 2021," butyag ni Sumagaysay sa text message.
Gitin-aw sa opisyal nga nahitabo ang maong lakang pinaagi sab sa rekomendasyon sa Infectious Disease Specialist (IDS) ngadto sa lokal nga panggamhanan sa siyudad kon diin si Sumagaysay ang natahasan sa pagpakigsabot sa tagdumala sa shrine.
"Nag-recommend man gud ang IDS society sa atoang LGU nga kung pwede wala dyuy tapok anang adlawa ug akoy natahasan nga makig-estorya sa management," dugang pa sa text message ni Sumagaysay.
Mapasalamaton si Sumagaysay kay nakasabot sab ang tagdumala sa shrine sa maayong tumong sa siyudad aron nga sirad-an ang compound sa niini sa maong adlaw.
"Nagpasalamat ta kay ila dayon nasabtan ug nisugot dayon sila sa atoang recommendation," panapos sa text sa opisyal.