SUPERBALITA CEBU

Sugilanon: Marka sa panuway

CHITO E. GERMINO

Paknaan, Mandaue City, Cebu


Nakamata si Alex nga gialimungawan. Nagsige siyag pangawot sa tuo niya nga paa. Nag-brip siya nga natulog. Mibangon siya ug gipasiga ang suga sa lawak. Gitan-aw niya ang dakong orasan nga gibitay sa bungbong habig sa kasadpan, nagtug-an sa takna nga alas nuybe imedya na sa gabii. Usa ka oras ug tunga na siya nga nahikatulog. Wala pa mosulod sa ilang lawak si Chona, iyang kapikas. Daghan pang gipangkurikuri sa ubos, sa ground floor sa ilang balay, lakip na ang pagsigeg ‘chat’ sa mga higala sa iyang selpon.

Wa mahimutang si Alex sa kakatol sa iyang paa. Daw napaakan og mananap ang iyang panit. May milibagha sa iyang paa. Mipula ang libagha daw gisuwat og pentel pen nga pula sa iyang paa. Unom ka pulgada ang gitas-on sa libagha ibabaw sa tuhod ug duol na sa bugan. Naporma kinig ‘XI’, Roman numeral sa ‘Eleven.’ Dako ang kahibulong ni Alex kay katol gyud kayo ang maong libagha.

Naabli ang pultahan ug misulod si Chona. “O, wa pa diay ka matulog?”

“Nakamata ko sa kakatol sa akong paa,” tug-an ni Alex nga nagsige og kawot sa paa.

“Napaakan tingali nag utitod,” ni Chona nga miabli sa cabinet ug mikuha og tambal. Gipaghiran niyag puti nga ‘ointment’ ang libagha sa paa ni Alex.

“Wa ka mahibung ining akong libagha nga pula, nga morag XI, Roman numeral sa Eleven?” ni Alex.

“Agi na sa imong kuko sa pagkinawot nimo,” ni Chona nga nagpahiyom, pero isog og mga mata.

“Mora man nig marka sa panuway,” ni Alex nga gibatig kahadlok.

“Tuo-tuo man ka. Nganong hikapon man kas panuway?” ni Chona nga misulirap ang ang mga mata nga mabiaybiayon.

Mibalik paghigda si Alex. Di pa matulog si Chona. Daghan pang seremonyas mahitungod sa iyang hitsura. Maanyag iyang asawa. Puti ug hamis ang kutis. Sa edad nga saysinta makapanghambog pa kini nga trayentay nuybe pa. Si Alex sa edad nga saysintay tres, morg utsinta na ang nawong. Kahibudngan iyang hitsura nga layo ang kamaguwang sa tinuod nga edad. Nakabatyag gani siya nga gikaulaw na siya ni Chona. Di na kini makigkuyog niya sa sosyalan. Kon imbitahon si Chona sa iyang mga higala di niya pakuyugon si Alex. Kon si Alex ang imbitahon, di siya mokuyog kang Alex. Sukad na-senyor sitisen si Alex wala na silay relasyon sa kama. Hilasan na si Chona kay tiguwang na kuno sila. May duha sila ka anak nga nangaminyo na ug may kaugalingon nang panimalay. Sila na lang duha ang nagpuyo sa ilang balay.

Mga retiradong magtutudlo sila sa eskuylahan sa gobyerno. ‘Hobby’ ni Alex ang magbasa og Bibliya kada buntag. Daghan siyag nadiskubrehan nga mga anomaliya sa relihiyon nga wa mahisubay sa Bibliya. Kanunay niyang suginlan si Chona bahin niini, apan dili intresado si Chona. Katapusang hisgot ni Alex sa kapikas nakaingon siya nga basig si Satanas naa pod magpuyo sa Vatican. Naniga pag-ayo ang mga mata ni Chona sa iyang nadungog. Membro siya sa Catholic Women’s League ug suod kayo sila si Padre Wilson, pari nga wa pay kuwarenta ang edad. Miingon si Chona, “Undangi na ang pagbasa sa Bibliya. Makabuang na!”

Alas sayis sa buntag pagka sunod adlaw samtang naglakaw si Alex padulong sa merkado aron mopalit og Superbalita, milabang siya sa karsada nga way tan-aw-tan-aw. Nadasmagan siyag itom nga Van padulong sa Norte. Nalagpot siya ngadto sa sementadong abaga sa dalan tungod sa merkado. Mihunong ang nakadumbol kaniya. Apan igo da siyang nakapasiklap sa plate number ‘XI-666’. Dayon nawad-an siyag panimuot.

(KATAPUSAN)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph