SUKAD pa kaniadto aduna nay panagsungi o conflict ang relihiyon ug siyensiya (religion and science). Kon atong basihan ang tinuhuan ug Bibliya, kitang mga tawo gikan nila ni Adan ug Eva, ang unang mga tawo sa kalibutan nga hinimo sa Ginoo. Apan kon atong tuhuan ang Science, gikan ta mga aliwas.
Ug gumikan sa atong tinuhuan nga Romano Katoliko, motuo gyud ta nga adunay Ginoo nga maoy atong kasandigan kon wala na kitay laing kadangpan. Siya maoy katapusan natong sandigan ug pangayuan og tabang. Sama karon ning panahon sa pandemiya, ang uban kanato dili na motuo sa siyensiya ug medisina kay alang kanila ang pangadyi ngadto sa Labaw’ng Makagagahum ang panagang batok ning Covid-19. Pangadyi ra ba gyud ang atong tuhuan ug dili na ang siyensiya ug medisina? Maayo siguro nga unahon nato ang proteksiyon sa atong lawas pinaagi sa medisina dayon ubanan sa pag-ampo.
Dunay magsusulat nga nagkanayon: “Mixing old wine with new wine is stupidity. But mixing old wisdom with new wisdom is maturity.” Tingali ato ning masagop sa atong pagtuo. Kanus-a ba kita makaingon nga tinuod na gyud nga nahinog ang atong pagtuo sa Ginoo? Ato ba kining mapakita sa pagkalarino nato nga moyamyam sa mga pangadyion?
O diha sa atong mga maayong buhat?
Ug unsaon man sad nato’g sukod ang pagka-husto o kakuwang sa atong pagtuo? Samtang peligroso kon mominus ba ang atong pagtuo sa Ginoo. O mas dako sab ang kadautan kon pasobrahan ta ang pagpakita sa atong pagka rehilyoso. Tingali anha nato kuhaa ang mga tubag ning mga pangutana diha sa kina-uyukan sa atong kasing-kasing ug sa dan-ag sa atong tanlag?
Anaa ra sa tagsa-tagsa kanato ang pagsukod kon unsa ka kuwang o kasobra ang lanat sa atong pagtuo sa usa ka dili makita nga gahum nga gitawag nato og “Diyos.” Basta ang atong nahibaw-an mao nga ang atong pagtuo ug pag-ampi nahisama sa Wi-Fi nga dili nato sila makita, apan aduna siyay gahum alang sa “connectivity.” (bobbygnalzaro@gmail.com)