SUPERBALITA CEBU

39 anyos lalake gidagit, mag 2 ka buwan missing

IULI INTAWON: Mao kini ang pakiluoy nga panawagan sa inahan ni Oniel Natividad, 39, kinsa gidagit niadtong Nobiyembre 24, 2020 sa mga tawo nga nagsakay og duha ka mga sakyanan. / ARNOLD Y. BUSTAMANTE

NAGPATABANG sa Anti Kidnapping Group (AKG) 7 human dul-an sa duha ka buwan na nga na missing ang ilang kabanay.

Ang missing sukad niadtong alas 7 sa gabii sa Nobiyembre 24, 2020 mao si Oniel Natividad, 39, taga dan A. Lopez, Barangay Calamba, Siyudad sa Sugbo.

Giingong gipugos sa pagpasakay si Natividad sa grey nga pick-up samtang nagpalit unta og pagkaon sa B. Rodriguez Street atbang sa Vicente Sotto Memorial Medical Center (VSMMC).

Matod sa live-in partner ni Natividad, nga si Ave (tinuod nga ngan gipugngan) nga nakita pa niya si Oniel nga naglingkod sa kilid sa karsada nga nagpaabot sa gi order nga pagkaon.

Apan kalit lang nga naabot ang sakyanan nga nisalipod kang Oniel ug laing sakyanan nga iyang gihulagway nga puti nga Mitsubushi Adventure.

Pipila ka gutlo ang milabay, iyang nabantayan nga adunay kaguliyang, apan sa paglarga sa sakyanan, wa na usab si Oniel.

Nisunod usab ang laing sakyanan nga dunay sakay nga naka bonnet nga adunay dala nga mahait nga hinagiban.

”Makita nimo sa ubos sa sakyanan, naay commotion, naay struggle ang tiil, then after ana kay nidagan na dayon to ang pick-up nga silver. Then nakakita sad kog lalaking naka bonnet, naa syay gidala nga something sharp, either ice pick. Nisakay sya atong Adventure nga white, nidagan sila,”matod ni Ave.

Pipila ka minutos ang nakalabay, nanawag si Oniel gamit sa cellphone, apan ang higala na ni Ave ang mitubag tungod sa iyang kahadlok.

Sukad niadto wa na siya mobalik pa sa pagtawag.

Nagtuo sila nga mga tinugyanan sa balaod ra ang nagdagit kang Oniel tungod kay nahitabo usab kini sa ilang pag-umangkon nga si Dave Natividad niadtong Enero 2020.

Pasangil nila nga giplanteran og duha ka kilong shabu sa mga pulis si Dave sa siyudad sa Mandaue ug naa na karon sa bilanggoan.

WAY KAGUBOT

Apan sa imbestigasyon sa Abellana Police Station atol sa pag report niini sa ilang buhatan, way makabutyag nga adunay kagubot sa lugar nga unang gibutyag sa live-in partner.

Matod ni Police Major Elisandro Quijano nga bisan ang pulis nga naka-detail sa atubangan sa tambalanan wa makabantay nga adunay kasikas.

Ang AKG nipasalig nga andam sila nga motabang sa imbestigasyon bisan kon wa pa maestablisar nga kidnapping ang nahitabo tungod kay way nangayo og kwarta sa mga nanagit. (AYB, GPL)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph