UPAT ka mga job orders (JO) sa lokal nga kagamhanan gipalagpot sa puwesto human nasakpang nag-inom og makahubog nga ilimnon bisan pa sa gipatuman nga liquor ban hangtud sa Enero 31, 2021.
Sumala ni Public Safety and Security Command Center (PSSCC) head Angel Sumagaysay, ang insidente nahitabo niadtong Enero 2, 2021, sa Bolton Elementary School, ang lugar kon diin himuon ang Rapid Action Team (RAT).
Si Lemuel Ortonio, chief sa Human Resource Management Office (HRMO), nagsulti nga ang upat pulos JO nga gidestino sa Rapid Action Team (RAT) gikan sa nagkadaiyang buhatan.
Matud sa hepe nga mga badlungon nga mga plantilla nga kawani ang gipailawom sa pagsusi ug konperensiya uban sa Investigating Committee sa HRMO, apan nakalapas nga JO o Contract of Service nga mga personahe gipalagpot gilayon.
Giklaro ni Ortonio nga ang lokal nga kagamhanan wala nagtolerar sa mga badlungon nga empleyado kay nagsilbi silang ehemplo sa masinugtanon sa balaod nga mga Dabawenyo.
Kahinumdoman nga ang siyudad nakadakop og 14 ka mga empleyado sa City Engineer's Office nga nag-inom og ilimnong makahubog sulod sa Motor Pool compound niadtong Disyembre bisan pa sa liquor ban. (WGM/CIO)