SUPERBALITA CEBU

Bag-ong big-3 sa NBA

Mitapon sa Brooklyn Nets ang kanhi NBA MVP ug three time scoring champion James Harden gikan sa Houston Rockets pinaagi sa blockbuster trade nga gikalambigitan og upat ka team.

Ang Nets nisugot human usab ilang gianunsyo nga andam silang mo-trade bisan kinsa sa ilang line-up gawas lang ni Kevin Durant nga ilang nakuha sa niaging off season.

Apan sa pag-abot ni Harden sa Nets, surprisa nga wala maapil si Kyrie Irving kinsa nag-atubang usab og kontrobersiya sanglit wa pa kini magpakita sa Nets ug way nahibawo bisan ang iyang coach nga si Steve Nash gawas lang sa gika-report nga nitambong siya party sa iyang pamilya sanglit personal nga rason ang gigamit sa iyang pagkahanaw sulod na sa kapin usa ka semana.

Si Harden maoy sentro sa trade tali na sa Indiana Pacers, Nets ug Cleveland Cavaliers nga naglambigit sab sa ilang mga sinaligan apan hangtod ning pagsuwat wala pa makumpleto ang tanang dokumento ug wala pa maaprobahi ni NBA Commissioner Adam Silver.

Ang Nets niining puntoha, aduna nay kapasidad nga nakamugna og 75 puntos gikan sa bag-ong big three sa NBA nga gilangkoban ni Durant, Irving ug Harden.

Ang Nets nibuhi kang Caris Levert nga napadpad sa Pacers, ug Jarrette Allen ug Taurean Prince ngadto sa Cavaliers ug tulo ka first round picks para makuha si Harden.

Samtang si Victor Oladipo gikan sa Pacers nadagit paingon sa Rockets kinsa makig-uban ni John Wall sa back court para sa team gikan sa Texas.

“We’re just not good enough. I love this city. I literally have done everything that I can. I mean, this situation is crazy. It’s something that I don’t think can be fixed.” padayag ni Harden human sila gikuniskunis sa Lakers sa niaging adlaw.

Gipili ni Harden ang Nets sanglit iyang makauban si KD nga iyang kauban kaniadto sa Oklahoma City Thunder dihang tag-19 anyos pa ang ilang edad ug dako ang ilang tsansa nga makaabot sa NBA finals gumikan sa pagkamugna sa bag-ong NBA trio.

Si Durant nag-average og 29.9 points, 27.1 points kang Irving ug 24.8 points kang Harden sa unang 9 ka mga duwa karon nga season.

Ang pagkabalhin ni Harden sa Nets nakapangangha sa uban nga star sa NBA sanglit iyang ikauban ang laing duha ka star nga maoy usa sa best duo sa NBA ug karon nahimo nang Big Three.

Sa wala pa magsugod ang 2020-2021 NBA season, nagpakita na og timailhan si Harden nga mobiya sa Rockets sama sa wala pagtunga sa ilang training camp , overweight nga niduwa sa ilang kuponan ug nakamulta og $50,000 gumikan sa kalapasan sa health protocol nga niresulta sa pagkamoritsing sa ilang standing, 3-9. / PAC


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!