Heirlooms Cafe sa bukid

Ni Ram Alcoseba Martinez

Niadtong 1984 sa dihang nag intern pa ko sa ACMDC-Atlas Memorial Medical Center sa DAS, Lutopan sa Toledo City, Sugbo kausa ra ko nakaagi subay sa Manipis Road kay ang Naga Uling Road haruhay pang kaagian sa mga sakyanan niadtong mga Jegans ug Nine Brothers.

Apan di pa lang dugay nakasuroy ko og balik human nga gipatuman ang lockdown (resulta sa hulga sa coronavirus disease) dinhi sa Sugbo, didto sa Manipis Road.

Kon kaniadtong 1980s dili maayong agian ang maong kalsada kay lagi nipis ug peligro sa mga sakyanan ilabi na kon ting-uwan, karon, dako na ang kausaban ug nakurat ko sa kalapad ingon man

sementado na ang dalan gikan sa Barangay Langtad, Naga lahos na sa Jaclupan, Talisay City.

Mas ma-appreciate na sab ninyo ang bukid nga labong ang kakahoyan ug naghatag og dugang kabugnaw sa pamate ilabi na ang greenery nga nindot sa atong panan-aw.

Adunay mga bahin nga wa pa matapos og riprap apan makaingon ko nga mas luwas na ang maong dalan agi-an itandi kaniadto.

CAFÉ

Ako sab namatikdan nga adunay pipila ka mga coffee shop daplin sa dalan paingon sa Campo 7, Minglanilla.

Gawas pa, sa maong area adunay mga nanamaligya og tanom alang niadtong plantitos ug plantitas.

Namatikdan nako nga milambo na ang area tungod sa mga nangsudlot nga mga negosyo sa maong lugar.

Ang akong tuyo nga suroyon medyo natago, ang Heirloom Coffee & Kitchenette nga nahimutang sa Pepito’s Farm.

Kon makalili mo sa Facebook page sa Heirloom gihulagway kini nga: “Café paradise in the mountainside.”

ASA DAPIT?

Ang Heirloom nahimutang sa Udlom Sinsin Road, Barangay Sinsin, bukirang bahin sa Dakbayan sa Sugbo.

Gibana-bana nga kapin sa 26 km. ang gilay-on kon manukad sa Cebu City proper ug dul-an sa usa ka oras nga biyahe depende sa sitwasyon sa trapiko.

Sa imong pag-abot sa Manipis Barangay Hall mga 30 minutos gikan sa Tabunok, left turn padung sa Sinsin Road ug imong landmark mao ang gamay nga lotto outlet.

Gibana-bana nga 10 minutos nga padagan sa sakyanan makita na ang kan-anan nga tua sa ibabaw sa bukid.

Taas-taas nga ang-ang sa hagdanan ang imong sak-on pasaka sa maong establisemento.

Taliwala sa kataas sa biyahe inig abot nimo sa ibabaw nga bahin, 360 degrees view ang mosugat sa imong panan-aw sa maong bukid.

HEIRLOOM

Relaxing ang ambience sa Heirloom Coffee & Kitchenette layo sa “hustle and bustle” (ka-busy ug hugpa sa daghang tawo) sa siyudad.

Kon maatol nga uwan ang imong pagduaw di nimo makita ang kalapad sa bukid, apan di maguol kay adunay higayon nga mopatim-aw ang bangaw (rainbow) nga perfect sa inyong selfie.

Kon basehan ang panulti-on nga “piso nalay plete maabot ka sa langit” kini gumikan kay mohabol ang mga panganod sa maong dapit.

KAPE UG UBAN PA

Di lang ang nagkalain-laing matang sa kape imong matilawan sa Heirloom kay aduna sab silay gitanyag nga lamiang pagkaon.

Gikan sa chicken meal ngadto na sa burger nga adunay palaman nga “roast pork” dili ang naandan nga patty sa ubang kan-anan.

Akong ikapasalig nga lahi kini nga experience sa inyong pagpanuroy kon inyong suwayan kining akong kasinatian.

Sa mga mahilig mokuha og hulagway “very Instagrammable” ang lugar.

Selfie na, wa bitaw bayad! (Ubang hulagway gikan sa Heirloom Facebook Page)