DUGANG 34 ka mga bag-ong kaso sa coronavirus disease (Covid-19) ang natala sa Cagayan de Oro, usa niini locally stranded individual (LSI) ug 33 ang mga local transmissions, sumala sa report sa City Health Office Huwebes, Enero 14, 2021.
Ang kinatibuk-ang ihap sa mga kumpirmadong kaso sa Covid-19 sa dakbayan anaa na sa 3,051.
Sumala ni Acting City Health Officer Dr. Lorraine Nery, sa 33 ka mga bag-ong lokal nga kaso, 19 ang mga close contacts sa mga pasyenteng nagpositibo sa coronavirus, usa ang local authorized person outside residence (Apor), 12 ang mga local index cases ug usa ang patay.
Sa 3,051 nga kinatibuk-ang kaso sa Covid-19 sa syudad, 414 ang mga returning overseas Filipino workers/locally stranded individuals (ROFs/LSIs) ug 2,637 ang mga local transmissions.
Matud ni Nery, sa 2,637 nga mga local nga kaso, 182 ang mga persons deprived of liberty (PDLs), 1,345 ang mga local index cases, ug 1,110 ang mga local cases with link.
Ang Cagayan de Oro adunay 357 ka mga active cases, 102 niini na-admit sa Northern Mindanao Medical Center ug uban pang mga ospital sa syudad, 242 ang mga outpatients, ug 13 ang mga ROFs/LSIs.
Nakatala usab og unom ka mga Covid-positive nga mga kaso nga karon naka-recover human nagnegatibo ang resulta sa ilang repeat swab test. Anaa na karon sa 2,539 ang ihap sa mga nakarekober nga mga kaso sa dakbayan.
Sa maong numero, 292 ang mga LSIs, 108 ang mga ROFs, ug 2,139 ang mga lokal nga kaso (community: 1,806; Apors: 333).
Ang ihap sa mga namatay sa Covid-19 sa syudad naa sa 155.