SUPERBALITA CEBU

Rabacal: Bag-ong Carbon Public Market

Pakabana

Napirmahan na ang joint venture agreement tali sa Cebu City ug Megawide Construction Corporation (MCC) aron pag-redevelop sa Carbon Public Market. Ang Phase I sa proyekto nga mobalor og P5 billion gikatakdang sugdan sa Marso ug mahuman sa Oktubre, karong tuiga. Kini mao ang paghimo og night market duol sa Compania Maritima building.

Gipasalig ni Mayor Edgardo Labella ug MCC nga way vendor nga mapapahawa tungod kay abli gihapon ang Carbon Public Market ug naay gitaganang luna alang kanila bisan magsugod na ang konstruksiyon.

Si Bise Mayor Mike Rama nga kanunay nga nag-awhag sa mga konsehal nga basahon ug tun-an pag-ayo ang unsolicited proposal sa MCC usa kini mopasar og resulosyun nga maghatag og authority kang Mayor Labella sa pagpirma sa maong Joint Venture Agreement (JVA), namahayag nga 10 ka mga konsehal mi-uyon niini. Suma ni Cemvedco board chairman Erwin Goc-ong nga sumala sa bise mayor nga mibotar ang mga konsehal nga wala basaha ang kinatibuk-ang JVA, apan ang portion lamang sa maong kontrata. Kon tinuod kini, giunsa nila pagkahibawo kon makaayo ba ang tanang probisyon niining maong kontrata?

Alang kanako, katungod sa bise mayor ang pagpahibawo sa katawhan kon unsa man ang mga probisyon sa kontrata nga iyang gituhoang dili maayo ug kon nakurihi-an ba kini. Kay tingalig magduda ang mga Sugboanon nga adunay nahaylo sa pagbutar pabor sa JVA.

Sa laing bahin, unsa man kahay mahitabo niining maong proyekto kon mahinayon sa pagpasaka og kaso ang Cebu CFI Community Cooperative (CFI) batok sa Joint Venture Selection Committee (JVSC) nga naghatag og pagtugot sa Megawide Construction Corporation (MCC) sa pag-redevelop sa Carbon Public Market? Ang CFI miapil sa bidding alang sa pag-redevelop sa Carbon. Mihulga si CFI chairman Winston Garcia nga mopasakag kasong kriminal sa Ombudsman’s office batok Cebu City JVSC sa mosunod nga mga adlaw.

Mapadayon ba ang maong proyekto kon adunay kaso labi na og mangayo og temporary restraining order (TRO) ang kihante kay dili man kini national government project? Mao kini problema kay murag malangay na usab ang pagpatuman sa proyekto.

Kutob nalang karong adlawa ang 60 diyas nga gitagal sa Department of the Interior and Local Government (DILG) sa local government units (LGUs) sa pagtapus sa road clearing operations (RCO). Kini nag-apil sa mga nakaali sa kadalanan ug aseras, pag-imbentaryo sa kadalanan, ug uban pa.

Ang validation sa mga probinsiya, siyudad ug munisipyo, kon natuman ba ang direktiba, himuon sugod sa Enero 18 – 22. Apil usab nga i-validate sa DILG Validation Teams ang tricycle route plans nga agian sa mga tricycle tungod kay ang balaud nagdili kanila sa pag-agi sa national highway. Ang mga opisyal nga mapakyas sa direktiba mag-atubang og kasong administratiba. (mannyrabacal1144@gmail.com)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!