SUPERBALITA CEBU

Barrita: P500M ipalit og Covid-19 vaccines

Tikdul-Tikdol

UNSAY nakadugay sa kagamhanan sa syudad sa Sugbo sa pagpalit og bakuna batok sa Covid-19? Si Cebu City Mayor Edgardo Labella namahayag nga dunay gigahin nga P500 milyones alang sa pagpalit og bakuna batok sa coronavirus.

Si Presidente Rodrigo Duterte niingon na nga di manghilabot ang gobyerno nasyonal sa mga lokal nga kagamhanan kon mamalit sila og bakuna batok sa Covid-19 alang sa ilang mga constituents. Nianam ra ba og saka ang mga kaso sa Covid-19 sa syudad. Unsa pa may atong gipaabot?

Matod pa sa Presidente, “I’m now addressing the mayors and governors: You can choose any vaccine you like to buy. We don’t care which one you choose. We won’t interfere in all things related to the purchase.”

Apan angay nga pilion sa mga opisyal sa syudad sa Sugbo ang mas epektibo nga klase sa bakuna aron mosalig ug magpabakuna ang mga tawo. Angay natong masayran nga daghang mga tawo nga talawan sa injection ug mahadlok sa bakuna.

Si Mayor Labella niingon nga ang Cebu City usa sa mga local government units (LGUs) sa Pilipinas nga adunay cold storage facility alang sa mga bakuna nga ginama sa Pfizer ug Moderna, mga bakuna batok sa Covid-19 nga taas og efficacy rate ug gigamit na didto sa Estados Unidos ug Great Britain.

Sumala pa ni vaccine czar Secretary Carlito Galvez, ang Cebu City, Metro Manila ug Davao City lang ang dunay storage facility alang sa minus 70 degree Celsius nga gikinahanglan sa maong mga bakuna.

Si Vice Mayor Mike Rama miboluntaryo nga magpabakuna batok sa Covid-19. Angay una niyang tan-awon ang matang sa bakuna nga gamiton aron di siya mahimong guinea pig sama sa mga sakop sa Presidential Security Group. Di na ra ba siya modagan pagbalik isip bise mayor.

Si Mayor Labella niingon nga di siya mopugos sa mga residente sa syudad nga magpabakuna sa Sinovac vaccines nga gigahin sa nasudnong kagamhanan alang sa Cebu City. Unaha lang mayor si Mike Rama kay niboluntaryo na.

Samtang si Senador Francis Pangilinan nanawagan sa mga Covid-19 managers ug vaccine planners sa gobyerno sa pagsalindot sa Sinovac tungod sa menos nga efficacy rate niini ug unom ka pilo pa ka mas mahal kon itangdi sa bakuna sa AstraZeneca sa Great Britain.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph