Nakadungog na ba kamo niadtong estorya kabahin sa usa ka tawo nga nangita sa nahulog niyang kwarta sa daplin sa karsada? Sa dihang gipangutana siya sa iyang amigo kon dinhi bang dapita mahulog ang iyang kuwarta? Ang tawo miingon nga dili dinhi dapita kon dili didto sa pikas sa kalsada. Nangutana ang iyang amigo nga “nganong dinhi man ka mangita nga dili man diring dapita nahulog ang imong kuwarta?” Ug ang tawo mitubag: “Dinhi lang ko nangita kay hayag man dinhing dapita ug ngitngit man didto.’
Susama ni sa pagkahinayak sa mga senador sa pagbuhi og bug-at nga mga bahad nga ilang imbestigahon ang pagpalusot og vaccine dinhi sa nasud nga gikan sa China nga maoy gigamit sa pagpatusok sa mga sakop sa Presidential Security Group (PSG). Apan unya sa dihang giantugan sila sa Presidente nga dili manghilabot, milikoy ang mga senador, niingon nga dili sila mosentro sa ilang imbestigasyon sa PSG. Ari sila moimbestigar sa uban nga kon giunsa sa pagpalusot dinhi sa nasud ang maong mga bakuna nga wa may kalibutan ang Food and Drug Administration (FDA) ug Bureau of Customs (BoC).
Puwerting tukmaa sa atong gihimong pananglitan sa unahan nganong adto man sila mangimbistigar sa lain tawo nga ang PSG man ang hingtungdan? Gumikan kay nahadlok sila sa bahad ni Presidente Rodrigo Duterte nga motumaw ang krisis kon mopugos ang Senado sa pag-imbestigar sa vaccine smuggling?
Gawas nga gi-invoke ni Duterte ang Executive Order 464 nga gipirmahan ni kanhi Presidente Gloria Macapagal Arroyo kaniadto nga dili mapugos ang mga sakop sa executive department sa pag-atubang sa bisan unsang congressional investigation kon walay pagtugot sa Presidente, nibahad usab si Digong nga iyang bunloton ang si bisan kinsa nga iyang sakop nga moatubang sa Senate o House investigations.
Nahinayak na ang senador sa ilang lakang ug sawayon sila nga mikakak kon dili nila ihinayon. Ihinayon nila apan dili ang PSG ang sentro sa ilang imbestigasyon. Ari sila mo-focus sa uban ug himuon lang nila nga tadtaran ang FAD ug ubang ahensiya sama sa Customs ug Department of Health siguro kon nganong nakalusot ug nagamit ang mga bakuna nga illegal man? Hadlok sila sa bahad ni Digong. (bobbygnalzaro@gmail.com)