Editoryal: Kay kompyansa lagi

Kartoon ni Gilbert Manantan
Kartoon ni Gilbert Manantan

Tungod sa nagkataas nga mga kaso sa coronavirus disease (Covid-19), nahukman sa kadagkuan sa mga pari nga Agustino nga nagdumala sa Basilica Minore del Santo Niño nga di na patambungan sa mga deboto ang mga misa novena.

Sugod man gud sa Enero, nagdoble ang digit sa gidaghanon sa bag-ong mga kaso sa Covid-19. Hapit pil-a og ka 10 ang mga kaso sa Enero kon itandi niadtong Disyembre. Kinsa man ang di mabalaka niana?

Apan ang mga kaso nga nisulbong di baya tungod sa mga Misa de Gallo ug mga misa sa simbahan. Kadaghanan naa sa mga tapot tapok, sama sa mga party. Bisan tuod kon gidili ang dagkong mga panagtapok niadtong holidays, duna gihapoy nag party nga sekreto o sa mga balay.

Ang interior kun sirado nga mga dapit mas kuyaw sa pagtakod sa kagaw sa Covid kon itandi sa open spaces, sama sa mga tugkaran sa mga simbahan. Busa di ikahibulong kon nganong wa magagikan sa mga Misa de Gallo ang bag-ong mga kaso, kon di naa sa mga tapok.

Gawas nga bukas ang mga tugkaran, higpit nga napatuman ang basic kaayong mga protocol, sama sa pagsul-ob sa mask ug face shield. Naa usab ang social distancing. Bisan kini lang tulo, makapaminos na kaayo ni sa kahigayunan sa pagpanakod.

Sa mga tapok, daghan ang kompyansa, magtangtang na sa mask ug face shield kon naa man. Di usab matuman ang social distancing tungod kay sagad, kon di man gani magpamilya lang, managhigala o paryente ang magtapok sa mga party ug bisan unsa nga kasaulogan.

Apan sakto gihapon ang hukom sa mga Agustino bisan kon ang simbahan ubos kaayo sa kahigayunan nga makatampo sa takod tungod kay sa kadaghan sa mga kaso, posible usab nga dunay mga manimbahay nga asymptomatic. Unya mao na hinuon kini ang makatakod sa ubang mga tawo. Karon laging panahuna di pa gyud angay ikompyansa. Tan-awa, di ba mga kaso misaka?

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph