Lima ka mga suspek ang nangadakpan sa duha ka managlahi nga buy-busts sa gidiling drugas sa kapulisan.
Unang nadakpan ang managsilingang Julius Booc, 28, kargador sa Carbon Public Market, ug Ceasar Igisan, 54, pulos molupyo sa Sityo Ermita Proper, Barangay Ermita, Dakbayan sa Sugbo.
Si Police Major Armando Labora, hepe sa Parian Police Station 1, nangulo sa operasyon pasado alas singko, Enero 13, 2021.
Nasakmit atol sa buy-bust mao ang 16 gramos nga shabu nga mobalor og kapin sa P100,000.
Pasado alas dos sa kaadlawon sa Enero 14, ang grupo ni Police Major Randy Caballesm, pangulo sa City Intelligence Unit (CIU) sa Cebu City Police Office (CCPO), nironda sa Sityo Panpanan, Barangay Buhisan,.
Nadakpan si Mark Anthony Alebiano, 31, molupyo sa naasoy nga dapit.
Gibanabana nga mobalor sa P136,000 ang kantidad sa nasakmit nga druga gikan kaniya.
Laing ronda sa Enero 14, usa ka inahan, iyang umagad nga babaye ug kamaguwangang anak sa Pier 2 sa Barangay San Roque sa Dakbayan sa Sugbo ang nasikop sa Philippine Drug Enforcement Agency (PDEA) 7.
Matod ni investigation agent Mario Portugal nga ang ilang target mao si Rommel Managbanag, 27, apan nakasibat una pa sila miabot.
Si Lorna, 63, maoy nidawat sa kwarta gikan sa poseur-buyer samtang ang umagad maoy nitunol sa shabu.
Ang mga dinakpan pasakaan og kasong paghupot og drugas. / BBT