Awtoridad sa panglawas sa Dakbayan sa Lapu-Lapu midoble sa ilang kahigpit sa pagbantay sa Mactan Cebu International Airport (MCIA) nunot sa taho bahin sa bag-ong variant sa coronavirus disease 2019 (Covid-19).
Ang variant sa virus gikan sa United Kingdom (UK) gikataho nga nakasulod na sa nasod pinaagi sa pasahero sa abyon gikan sa Dubai apan daling gilain dayon sa mga awtoridad sa Ninoy Aquino International Airport (NAIA).
Tungod niini, ang kagamhanan sa Lapu-Lapu mas mipahugot ug mipalapad sa ilang monitoring sa international flights.
Si Grace Mary Carungay, city epidemiological and surveillance unit officer sa Lapu-Lpau, nagkanayon nga ipaubos na usab sa swab test ang moabot gikan sa bisan asang suok sa nasod subay sa kamandoan ni Lapu-Lapu City Mayor Junard Chan.
Bisan makapakita og dokumento ang pasahero o na-swab na sila sa ilang gigikanan, ipaubos pag-usab sa samang test.
Ang naasoyng protocol una lang unta nga gitaganan sa kagamhanan alang sa international flights aron kalikayan nga masudlan ang dakbayan ug Sugbo sa bag-ong variant.
Gawas pa, aduna nay help desk ang kagamhanan sa tugpahanan nga mosusi sa mga pasaherong mangabot alang sa estriktong health protocol.
Ug human sa ikalimang adlaw sa ilang pag-abto, i-swab na usab ang usa ka indibidwal ug padayong bantayan bisan magnegatibo sa swab test.
Giangkon ni Carungay adunay pipila nga mireklamo sa protocol apan mihangyo lang siya sa pagsabot niini sanglit alang kini sa kaluwasan sa tanang Oponganon.
“Ato ning gituyo aron matan-aw gyud nato ang kalihukan aning Covid wala pa gani mi ka swab balik sa mga vendor ug drayber kay na busy mi aning bag-ong variant,” matod ni Carungay.
Si Chan, sa iyang bahin, mibutyag nga mas maayo ang ubang local government units (LGUs) adunay representante usab o ba kaha team nga mag-monitor sa ilang mga konstituwenti nga moabot sa tugpahanan sanglit ang ila rang mapaubos sa ilang protocol mga molupyo ra sa Lapu-Lapu.
Karong wala na hinuoy international flight nga gitugtan makatugpa sa tugpahanan sa MCIA. / GCM