Wa makaipsot sa kapulisan ang 44 ka mga tawo atol sa gilusad nga Oplan Bulabog sa mga sakop sa Cebu City Police Office gabii sa Enero 13, 2021 hangtod na sa kaadlawon sa Enero 14.
Ang mao nga mga tawo pulos nakalapas sa ordinansa sa curfew sa Siyudad sa Sugbo ug executive order ni Mayor Edgardo Labella.
Naglaroylaroy sila nga wa makapakita og mga dokumento nga sila authorized person outside residence (Apor) dihang gipangsita sa mga checkpoint.
Nangunay pagpangu sa operasyon si CCPO Director Police Colonel Josefino Ligan, kinsa nimando sa paglusad sa mga checkpoint sa 11 ka police stations.
“Kining atong pagabuhaton sunodsunod na ni until mahuman ang Pista Señor para paglikay gyud sa pagtapoktapok, labina ning mag-inom, mag-estoryahanay unya mapasa-sapa ang baso. Kay suma pa sa EOC, mao ni ang number one nga source of transmission, kining tapoktapok, mag-inom,” pagpasabot ni Ligan.
Matod niya nga di sila molugak sa pagbantay taliwa sa pagsaka sa mga kaso sa Covid.
Matod ni Police Major Eraño Regidor, hepe sa Community Affairs and Development Unit sa CCPO, nga kabahin kini sa ilang hugot nga pagpangandam sa mga kalihukan sa Piyesta Señor.
Giapil sa pagsusi sa mga pulis ang mga imnanan ug suroyanan sa bukid sama sa Busay ug Malubog.
Dinhi ilang nasakpan nga dunay nanag-inom bisan sa lawom na nga kagabhion.
Dugang ni Regidor nga gituyo kini nunot sa nagpadayon nga pagsaka sa kaso sa coronavirus disease sa dakbayan.
Ilang badlungon ang nagpabaya sa kaugalingon kay wa motuman sa health protocol.
Ang 44 gitugyan sa CCPO ngadto sa Prevention, Restoration, Order, Beautification, and Enhancement (Probe) sa Dakbayan sa Sugbo alang sa tukmang aksyon.
NASAKPAN
Usa ka imnanan nga nahimutang sa Barangay Kasambagan naabtan sa mga pulis ug mga personnel sa Cebu City Government gabii sa Enero 13 sa ikatulo nga hugna sa Oplan Bulabog.
Upat sa nag-inom ilang gidakop ug gitugyan sa Probe.
Matod ni Terencio Saavedra, executive assistant head sa Business Permit Licensing Office (BPLO), nga ikaduha na nga kalapasan ang nasupak sa establisemento subay sa executive order ni Labella.
“Amo na na siyang naisyuhan og show cause order last time. Unya karon lain napud nga violation. Naabtan ilang tindahan nga duna pay nag inom,” matod ni Saavedra.
Matod ni Saavedra nga naa ra kang manlalaban Jared Limquaico, pangu sa BPLO, kon unsay buhaton sa establisemento.
Samtang si Ligan niingon nga ang surprise inspection sa mga tindahan magpadayon hangtod mahuman ang kasaulogan sa Sinulog 2021.
Dugang ni Ligan nga sa ilang ikatulo nga hugna sa Oplan Bulabog nasuta nga ang mga establisemento nituman na sa ilang awhag gawas lang sa usa nga naabtan nga dunay nag-inom.
“Naay tay nahagip pa gyud dinhi sa Panagdait. Dunay upat ka tawo didto ang atong gi- turn over sa Probe aron adto sila magpundo hangtod nga sila i-release,” matod ni Ligan. /