Usa ka officer sa Bureau of Jail Management and Penology (BJMP) sa Dakbayan sa Danao girakrakan-patay sa Sitio Sta. Cruz, Barangay Dunggo-an, Danao, 10:30 sa gabii, Enero 14, 2021.
Walo ka mga armadong tawo nga nanagsakay sa upat ka mga motorsiklo ang nangrakrak ni JO2 Reymond Roble Vasquez, 34.
Patay na si Vasquez pag-abot sa tambalanan sa Dakbayan sa Danao. Si Vasquez sakop sa BJMP Danao ug taga Barangay Cogon Cruz.
Si Vasquez nakaangkon og daghang samad pinusilan sa iyang lawas ug ulo.
Si Police Master Sgt. Jose Michael Alegado sa Danao Police Station nga nahinabi sa Superbalita Cebu nagkanayon nga duty si Vasquez niadtong higayuna ug nagbantay kini sa gate sa BJMP Danao, dihang kalit nga niabot ang upat ka motorsiklo nga dunay mga angkas nga pulos naka-mask. Ilang gipauwanan og mga bala si Vasquez.
Ang eksena sa krimen nakuha sa CCTV camera sa dapit.
Atol sa pagsuwat ning taho, si Police Lt. Col. Maria Theresa Macatangay, hepe sa Danao City Police Station, nagkanayon nga wala pa silay matumbok nga motibo sa krimen ug nagpadayon pa ang ilang imbestigasyon.
Apan ang intelligence units sa kapulisan padayong nagkuha sa background ni Vasquez.
Gibutyag ni Macatangay nga duna silay nakuhang pasiunang impormasyon nga si Vasquez nadakpan na niadtong 2015 sa lungsod sa Balamban tungod sa kaso sa gidiling drugas.
Si Vasquez aktibo nga sakop sa BJMP Balamban dihang nadakpan. Human kini gipa-rehab ug nakagawas, naka-duty sa BJMP Danao.
Wa masuta kun nganong nakabalik sa serbisyo o napasakaan ba og kasong administratiba.
Gawas niini, sutaon sab nila kun wala bay gikabangi nga personal sanglit sa initial nga sulti sa mga kauban sa trabaho, pamilya ug uban pa. /