NORTH COTABATO -- Nalisang ang mga pasahero sa depasaherong bus sa babaye nga misakay nga gituohang dunay dala nga bomba alas 11:15 sa buntag niadtong Huwebes sa siyudad sa Kidapawan.
Ang babaye gihulagway nga dunay problema sa pangisip ug molupyo sa Pigcawayan sa nahisgutang probinsiya.
Naalingatan sa mga pulis ug Civil Security Unit (CSU) nga naglisud ang babaye sa gidala nga bag.
Sa dihang gitabangan ang babaye sa CSU, nahibulong sila kay bug-at kaayo ang bag.
Abtik nga nagresponde ang mga sakop sa Explosive Ordnance Disposal o EOD team sa Kidapawan City Overland Terminal.
Sa diha nga gi-abrihan sa EOD ang bag sa babaye, nakompirma nga mga bato ang sulod sa bag ug mga personal niyang mga gamit.
Nakompirma sab sa mga awtoridad nga "mentally challenged" o dunay diperensiya sa pangisip ang babaye gumikan magpataka og istorya, hinungdan nga gibuhian na lamang siya.
Kahinumdoman nga niadtong miaging semana, nakugang sab ang mga pasahero sa plastic bag nga gibilin sa bus nga dunay sulod nga cream bread (pan) ug dunay palaman nga cellphone, battery ug mga wirings apan negatibo nga bomba.
Seguridad sa terminal gihugtan pa og maayo sa mga awtoridad. (Edgar E. Fuerzas)