Si Gobernador Gwendolyn Garcia mipaklaro nga dili prayoridad niya ang pagpalit og bakuna batok sa coronavius disease 2019 (Covid-19). Matod pa, mas hatagan sa gobernador ang pagpalambo sa agrikultural nga aspeto sa kalungsoran.
Dili tiaw ang magasto sa lalawigan kon mogahin og salapi alang sa pagpamalit og bakuna, bisan ang Sugbo maoy labing adunahang lalawigan sa nasod. Dili ba kaha buot ni Garcia nga ang kagamhanan sa kalungsoran maoy direktang molapit sa bakuna? Diskarte lang.
Apan ang ubang local government units (LGU) sama sa Dakbayan sa Sugbo apan managlahi ang diskarte sa ilang inisyatiba, dunay hinay o namati kaha una ug ang uban paspas o agresibo sa ilang inisyatiba.
Asang dapita nahimotang ang Dakbayan sa Sugbo? Klaro nga naa sa nahiuna. Atol ning pagsuwat, ang mga opisyal sa dakbayan gikataho nga “mogahin” pa og P400 milyunes alang sa pagpamalit og bakuna.
Ubang LGUs nga dunay inisyatiba nakagahin na og pundo samtang ang uban naa na sa punto sa pagpakigsabotsabot sa mga supplier sama sa Dakbayan sa Manila, sumala sa taho.
Nganong langay ang dakbayan sa Sugbo? Dili agresibo ang mga opisyal? O “wait and see” ang pamatasan? Basin naapektohan sa survey sa Pulse Asia nga sa Visayas, diin 88 poriyento ang dunay “concern” sa bakuna ug 55 porsiyento ang dili uyon magpabakuna.
Si Bise Mayor Michael Rama nisalikway na sa maong kabalaka ug nagkanayon nga gusto nga una nga mabakunahan.
Tungod sa pandemiya, taas ang demanda sa bakuna sa Covid-19. Kon dili agresibo, seguradong mahutdan dayon ug mosamot kalangay ang pagkuha sa bakuna, hinungdan ang ubang LGUs naningkamot nga makauna sa pagpalit.
Haw-ang ang inisyatiba kon sagulan og pagduhaduha.