SUPERBALITA CEBU

Nadela: Pit Senyor, para sa mga frontliner kini!

ASOY NI

Malipayon ug maampingon nga pagsaulog sa kapistahan ni Senyor Sto. Niño. Bisan kinsay imong pangutan-on kung kumusta ang piyesta Senyor itandi sa nanglabayng katuigan, usa ray ilang tubag. Lagi tungod sa pandemya mingaw. Ambot kong ang ilang gipasabot nga mingaw mao ang pagka kanselar sa halos tanang relihiyoso ug kultural nga kalihukan. Mingaw kay ang konsyerto, disco ug ibang saba saba kanselado. Ang kumbira napurnada. Pila nalang ka buok ang naghikay.

Kamo uyon mo ning maong tubag?Kong akoy pangutan-on dili mingaw ang iyang kapistahan. Para nako mao ni ang pinaka solemni nga selebrasyon, diin sa unang higayon magsaulog kita nga layo sa daghang kasikas, kasaba ug kaguliyang sa mga karsada kay gibahaan sa gatosan ka libo ka tawo.

Kanselado tinuod ang mga kalihukan sa Basilica Minore del Sto. Nińo, apan wala kini magpasabot nga sa atong tagsa tagsa ka kaugalingon dili kita makasaulog sa iyang kapistahan sa hilom ug luwas nga paagi.

Ngano man diay, tungod sa Covid-19 dili na ta makasiyagit og kusog pagpadayag sa atong dakong pasalamat sa Labawng Makagagahum nga gipaabot pa kita sa kasumaran sa iyang pangilin? Mao nga moingon ko nga taphaw ra kaayo nang estorya nga mingaw ang piyesta Senyor ning tuiga. Dili mingaw. Mabulukon gihapon ang iyang kapistahan taliwala sa daghang gidili.

Sa pikas nga bahin daw gituyo sab sa panahon nga maingon niini ang dagan sa selebrasyon tungod sa pinansiyal nga kakulian. Dili lalim ang atong naagian. Sa nanglabayng mga bulan pila ra man ka pamilya ang wala batia og kalisod. Giapas kita sa mga galastuhan ilabi na pagkaon. Haum lang nga magkat-on kita og pagtulon-an sa kinabuhi nga diay ang mga gastoso nga selebrasyon ihiklin lang una isip pangandam sa umaabot.

Aber, kinsa bay magtuo nga ang nahitabo sa Wuhan, China moabot dinhi sa ato? Dili ba nga sa niaging Sinulog 2020, taudtaud na diay nga gipangtakbuyan sa makamatay nga virus ang taga Wuhan, China? Samtang nagsige ta og warawara sa karsada, gipangtabonan na og face mask ang nawong sa taga Wuhan ug kanait nga mga dapit? Samtang naghuot ang halos tanang suok sa kinapusoran sa dakbayan sa Sugbo, nag-social distancing na ang mga tawo.

Liboan na sa mga pasyente didto ang nangamatay. Pero kita diri gawasnon kaayo nga namista, ug nisaksi sa daghang kalingawan. Nag-una niini ang kanselado nga Grand Parade nga gitakda unta ugma. Usa ra gyud ang atong gireklamohan, ang pagpawong sa signal sa atong mga cellphone kay hasol lage. Busa angay gihapon kitang magpasalamat nga luyo sa daghan natong mga pagkulang sa mga protocol nga gipatuman, nia nakaabot gihapon kita sa lain na sab nga kasaulogan sa kapistahan sa milagrusong bata. Ipadayon ang pagsampit.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph