Payong sa tanang festival ang Sinulog. Sayaw nga ritwal ug madagayaon pahinungod sa milagrosong imahen, batang balaan, nating karnero nga gisaad sa Dios nga si Señor Santo Niño gigasa sa Katsila Ferdinand Magellan sa Sugbo nga migakos sa Kristohanong pagtuo diin unang nagpabunyag ug nagpakasal sila Rajah Humabon ug Rayna Juana.
Nagsugod ang Sinulog sa 1980 sa kanhi Regional Dir. David Odilao sa Ministry of Sports and Development inabagan sa DECS panahon ni Mayor Florentino Solon. Dunay bersyon nga orihinal sa Sinulog ang Carmen panahon ni Mayor Venyong Villamor.
Sa kasugiran dunay mananagat nga nakabangal og itom daw sunog nga kahoy. Gilabog apan mobalik gyod ang maong dagsa hangtod nga gipahiluna sa payag. Ang gitipigan nga kahoyng itom nahimong imahen ni Señor Santo Niño. Sa dihang namunyag ang mga Katsila usa ra ka babaye ang nagpabawtismo nga nagsul-ob og kwentas nga dunay marka Birhen sa Carmen.
Sa naandan ang kagamhanan sa siyudad ug lalawigan sa Sugbo mogahin og minilyon ka pesos abag sa mga ganti ug ubang galastohan ingon man ang mga pribadong sektor.
Apan karong tuiga kanselado na ang Sinulog gumikan sa pandemya. Sa miaging tuig atraksyon sa Sinulog sa SRP ang Regatta Baroto Competition, Musical Fireworks Contest ug Baladhay Music Festival.
Hinuon dunay dili paborabling desisyon sa Sinulog Foundation Inc. (SFI). Gikwestyon ang 800,000 pesos nga kontrata sa MyTV alang sa exclusive coverage maayo gani kay gilibkas ni Mayor Edgar Labella.
Gipakontrata og P3M sa Manila-based San Miguel Foods nga mao ray makabaligya sa Sports Center, Plaza Independencia ug Fuente Osmeña Circle maong miangal sa pagmonopoliya ang Cebu-based Virginia Foods, Sunpride Foods ug Kings Quality Foods maong gipakanselar ni Labella kay nakalapas sa prinsipyo sa free enterprise.
(csa_1156@yahoo.com/0906-464-8954)