Ayaw na lagi og kompyansa kon wa ka maapil karong panahuna sa authorized persons outside residence (Apor) kay seguradong dakpon ka sa mga pulis sa Dakbayan sa Sugbo kon naa ka sa gawas naglaroylaroy lapas sa alas 11 sa gabii.
Sama sa 174 ka mga tawo. 20 mga menor de edad nga nasikop sa kapulisan gikan sa Huwebes sa gabii hangtod sa Biyernes sa kaadlawon, Enero 15, 2021 sa paglusad sa Oplan Bolabog kada gabii sa mga dapit sa dakbayan.
Sagad sa girumbo sa nagkadaiyang unit ug stations sa Cebu City Police Office (CCPO) mao ang mga imnanan ubos sa ilang area of responsibility.
Tuod man, 68 ka mga tawo ang nasikop sa kapulisan sa usa ka tambayan nga imnanan ug kan-anan sa Barangay Pardo, Dakbayan sa Sugbo.
Kadaghanan kanila nag-inom sa mao nga dapit lapas na sa alas 11 sa gabii nga kalapasan sa curfew ordinance sa Siyudad sa Sugbo ug executive order ni Mayor Edgardo Labella.
Ang CCPO hugot nga nagpatuman sa ordinansa ug executive order nunot sa nag-angat nga kapistahan ni Sr. Santo Niño ug misulbong nga mga kaso sa coronavirus disease (Covid-19).
Sa Enero 14, 2021, ang Siyudad sa Sugbo dunay 33 ka bag-ong mga kaso sa Covid-19.
Sukad sa sayong bahin sa Enero, nag double digit ang mga kaso sa Covid-19, taas kaayo itandi sa Disyembre 2020.
Si Christian Carlo Alon, sakop sa Cebu City Anti Mendicancy,nisulti sa Superbalita Cebu nga ang mga 18 anyos pataas ilang gi-seminar kalabot sa ilang kalapasan.
Pagkahuman ilang gipahatag og community service sud sa 12 ka oras.
Ang mga menor de edad ilang gi hold og lima ka mga oras samtang gipatawag ang mga ginikanan. / BBT