Usa ang patay ug duha ang nangaangol sa pagkasunog sa tulo ka andanang edipisyo sa Barangay San Antonio, Siyudad sa Sugbo sa Sabado sa hapon, Enero 16, 2021.
Si Police Executive Master Sergeant Rommel Bangcog, imbestigador sa Parian Police Station, niila sa namatay nga si Estrilito Baiño, 35, kinsa nakit-an nga nag-ubo duol sa pultahan sa room 5 sa ikatulong andana sa building.
Duha usab ang nangaangol nga giilang sila si Ergel Mandaue, 26, ug Vicenta, Cabaguas, 62. Ang duha pulos nakaangkon og first degree burns sa ilang tuo nga mga bukton.
Si Cabuguas maoy caretaker.
Matod ni FO2 Emerson Arceo, imbestigadot sa Cebu City Fire Department nga ang nasunog daan nga edipisyo. Sa ikatulong andana nagsugod ang kayo.
Dugang ni Arceo nga ilang nadawat ang alarma alas 2:50 sa hapon ug diha lang sa unang alarma ang sunog sa alas 2:54 samtang gideklarar dayon nga under control alas 2:59.
Ang edipisyo gipanag-iya sa usa ka Nenil Ongloyko, nga gitawag og Dumos Boarders and Transients samtang sa ubos sa edipisyo dunay pipila ka mga establisimento nga nag abang. Dugang ni Arceo nga alas 4:15 na napawong sa hingpit ang kayo.
Nipasabot siya nga tungod sa gidugayon na sa edipisyo nga pulos kahoy ang ibabaw hinungdan nga medyo dunay pagkalangan sa hingpit nga pagpawong.
Ilang gisuguro nga wa nay nabilin nga mga baga nga posible hinuon nga mobalik og siga.
Ang arson investigation division sa Cebu City Fire Dept., sa ilang unang nakita, niingon nga posibleng kuryente ang hinungdan sa sunog, apan dili pa masuta kon ngano.
“So mao na nga amo pa ipaubos sa investigation kay amo paman gud to balikan. Sa room 5 nag sugod ang pag-ulbo sa kayo nga matud pa sa mga nagpuyo didto kay bodega nalang daw na,” matod ni Arceo.
Samtang gibana-bana usab nga P300,000 ang danyos sa sunog.