PAMPANGA

Garcia: Pamanyukad king Tagumpe (Measuring Success)

Kapisik

“Ipanibala mu ing sablang gagawan mu king Ginu, at ding pamalak mu magtagumpe la.”

~Diparan|Dangka 16:Sunis 3

(Proverbs 16:3)

“Dapot ganakan me ing Ginung kekang Dyos,

uling ya ing magkalub keka king kegiwan manakitan pibandyan,

at patunayan ning tipan, a pengaku na karing pipumpunan mu, mengari king ngeni.”

~Pamiyulit king Batas|Dangka 8:Sunis 18

(Deuteronomy 8:18)

“At pagumasdan muy nung nanu ing anyaran ning Ginung kekang Dyos:

Lumakad ka karing paralan na, at pamintwan la ring batas na’t utus,

ding tuntunan na’t anyaran, anti kiing misulat king Batas nang Moyses, b

ang misaplala ka karing sablang daraptan mu at nukarin ka man munta.”

~ Aklat Mumuna ding Ari|Dangka 2:Sunis 3

(1 Kings 2:3)

“Kanakung mambang, e mu kakalingwan ing turu ku,

dapot bustan mung ing pusu mu pamintawan na la ring utus Ku,

king kekaban ding aldo at banwa ning bye at ing kapayapan miragdag keka.

E mu paburen a ing matatag a lugud at ing katapatan pasakitan da ka;

itali mu la king batal mu; isulat mu la king tipak king pusu mu.

Bang-ting upayang atagmwan mu ing saup

at mayap a tagumpe king panakit nin Dyos at tau.”

~Diparan|Dangka 3:Sunis 1-4

(Proverbs 3:1-4)

***

BALANG bage ating sukad dapot ing kutang mu, nanu ing malyaring ipanyukad? Ing dayu asusukad ya karing dangkal, lakbang at ning kekaban ning dayu at panaun ning pamaglakbe; ing pibandyan asusukad king dekalan at king ulaga ding pibandyan; ing kebyasnan asusukad kapamilatan ning belwan at pamisanak karing balang belwan at nung makananu la lalapat at agagamit king tune bye; ing legwan asusukad king nung makananu makagayuma ing lupa, katawan, kimut, siwala, at pamibage-bage karing sablang deti at dagdag pa ing legwan mu naman king belwan, kebyasnan at mayap a panugali. Dakal a bage asusukad at segana-gana namu mekad malyaring sukaran.

E na sukat ipangangas ning ninu man ing tagumpe keti king labwad uling nanu mang tagumpe iti mabating mu rin at e ta’man adala king sumangid a bye. dakal ka agawang apagmaragul mu—pibandyan, legwan, upaya, kasikatan o belwan at kebyasanan—pangsaguli mu ngan iti.

Mikasalapi ka mang limpak-limpak—malyari la pa mu ring bilangan. Sumikat ka man mabilug a yatu o makananu ne man mabilug a sikluban? Dakal ka tipun king bangku, e ya mu metung ing bale mu at e la keti, atin mu naman king aliwang bangsa. Minanu mo?

Manyambut ka man king ang-mabilug a yatung ligligan legwan—pabanwa mu ita at kayari makapag-artista na ka mo–e na ka mangalumpis balat? E na ka mangabalag a laman? E na puti o malagas ing bwak mo? O deng ipan mu? Ing kutang—angga kang pilang banwa kalagu o kasanting? Mekilala ing legwan o sentingan mu mabilug a bangsa at pati na aliwang bangsa uling migtagumpe ka king ligligan, o minanu mo?

Mika-upaya ka man a pamuntukan ing mabilug a balen, lalawigan, o mabilug a bangsa, e me mu rin apadukwan ing mabilug a yatu keka at lakwas na ing sikluban at ding e abilang-bilang a dekalan ding kata-katang sikluban. Pamuntuk na ka ning balen, lalawigan o mabilug a bangsa. O minanu mo?

Mibantug ka pauli ning kegiwan mu, katenakan mu o king gawa mung asna pangadakila. Misalapi ka pa’t merakal pibandyan, at pati na asawa. O minanu mo?

Ing tune tagumpe king bye ning ninu mang lelangan e malyaring asukad. Ing tune tagumpe ya pin ing pamagtagumpe tamu king pamanupad king tune tamung sukat gampanan–ing ing makayugne tamung pasibayu king Apung Ginu at at makatatag kasuywan a makatagulaling king Kakataskatasang Ibpa–ita alang angganan inya e malyaring sukdan.

Ita ing tune tagumpe.

***

Dake Talabaldugan:

1. manilàk (pangdiwa) maybug mangapanyuka pauli ning labis a kabsi o pamandiri king akakit, ababau o alalasa. English - to puke, early stage of vomiting, throwing up, retching, regurgitating, heave, spewing, hurling. Alimbawa king pamangamit: “Manilak kang tagana nung alasa mu ing lutu nang Tinang at agyang abau mu pa e na ka mikaganang mangan.”

2. manigò/manigù (pangdiwa) magpanigu, mayap a mumunang abli o panakitan king pamamisali lakwas na neng abak a kabusni-busni ning palengki o pipamisalwan; numabang king umpisa o kamumulan ning metung a pamisapalaran. English - have fine, favorable; prosperous initial sale of a stire on first hour or day; first or initial act in an undertaking being fine augury. Alimbawa king pamangamit: “Buri da reng mamisali keng palengki mapalad a manigu karing sasaling mumuna inya pin pipalis-palis da la reng abli da kareng nanu mang pamisali da kaybat ning mumunang-diling sinali karela.”

3. manikàl (pangdiwa) magal o pagal, sumawa, panamdam ning pamagkasakit keng pamandapat king metung a kimut a e mamalis ing darapat . English - tire/get tired get weary, get bored, sick, fed up, wear down, wear out, become exhausted, fatigue, run down, depleted in strength or patience . Alimbawa king pamangamit: “Makaba man ing kayang kapibabatan magisan mu rin iti kabud manikal ne ing pusu na ning taung pigsamantalan a ganaka.”

***

SADYANG GAWI DA RENG KAPAMPANGAN

Inyang minuna, nung manigu ka o ikang magpanigu keng pamanyali kareng mamisali keng palengki o agyang keng tyanggi dinan da kang tawad o mekad dagdagan da ing seli mu. Nung lima lang mangga deta gawan da na lang anam at ya naman ing bayaran mu. Kapanwalan da kasi makaswerti ita karelang magtinda.

Ngeni, nung makatawad ka man, bawasan da mu ing bayaran mu nung mung dakal ka saliwan. Nung sinali kang dinalan at limang pesus, ilako d’ya mu itang limang pesus. Ita na ing tawad mu. Nung paragdag ka mekad awsan da ka pang barat kagulut mu.

Tawad king panigu—metung a gawing makakalingwan na’t mababating.

***

Salamat pung dakal king pamanangkilik keng Kapisik at SunStar Pampanga. Malyari ko pung mag-email keng kek’ong talasulat king garciakragi@yahoo.com, mag-text o maus para karing kutang o munikala: 0942-3924-399 o 0945-3795-270.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!