GIPADAD-AN ang Syudad sa Sugbo og duha ka tangke de gyera aron makatabang sa gubat batok sa Covid-19. Tuyo niini mao ang paghadlok sa katawhan nga dili maglaaglaag karong Pista ni Senyor Santo Niño.
Matod pa sa balita, ang unipormadong sundawo sa AFP Central Command (Centrcom) ang gitahasan sa pagdili sa mga Sugboanon nga mosaulog sa pista sa Senyor Santo Niño ug masiguro mopuyo sa ilang kabalayan.
Nagkanayon si Konsehal Joel Garganera, deputy chief implementer sa Emergency Operations Center (EOC), nga ilang gisangpit ang Centcom aron mobantay sa Barangay Suba, Pasil, Ermita ug Sawang Calero. Tradisyon man gud sa maong mga barangay nga dunay ilang kaugalingong kasaulogan.
Gani, ang mga taga Pasil naandan na nga mobubo og tubig sa mga deboto.
Ang mga barangay kapitan sa maong mga dapit gipang-warning na sab nga dili tugtan ang maong mga kasaulogan. Padayon sab ang Oplan Bulabog.
Kini nahitabo human niadtong mga armadong kapulisan nga nagbantay sa Basilica del Santo Niño.
Ako lang klaruhon nga ang mga armadong sundawo ug kining tangke de gyera wala gitumong batok sa virus. Ang tumong niini mao ang paghadlok sa katawhan nga motuman sa mga health protocols.
Alang sa atong mga lider sa syudad ug sa kapulisan, kining ingon niini nga pamaagi mao ray makakumbinser sa katawhan nga mopuyo sa balay.
Apan, wala makapugong ang mga armadong kapulisan sa katawhan nga nagdasok sa mga pasiunang novena. Mas naundang pa ang pagdasok sa katawhan
Di man tuod mahadlok ang coronavirus batok sa armado, apan mahadlok ba kaha ang katawhan? Dili ba kaha moresulta kini sa mga kalain sa buot sa katawhan. Hmmm. Ambot lang.
Alang kanako, mas maayo gyud unta kon nag-invest pa ang Cebu City Hall og usa ka komprehensibo ug padayong information drive kabahin sa pandemya ug mga health protocols.
Dayon, ila unta giampingan ang ilang kredibilidad pinaagi sa paghimog mas gamayng mga sayop. Dayon remedyohan ang mga sayop.
Pananglitan, kadtong QPass nga mas dako pa sa ID sa mga hawsyaw nga media. Duna pa gyuy hinanggaw nga QR code. Imbes ilisdan og dili makauuwaw mga pass, ipabalikbalik hinuon og sul-ob.
Trabaho sab unta sa mga magdumala sa information campaign sa City Hall mao ang pag-aninaw sa mga isyu nga posibleng motumaw kada lihok ug makamugna na og mga lakang aron di kini mahimong krisis.
Ang akong nabantayan sa atong mga opisyal mao ang perming nag-damage control.
Sa ingon niini nga panglantaw, interesado kaayo ko makahibawo sa epekto sa paggamit niining mga sundawo ug tangke de gyera. Basin sab diay nga nasayop si Tarsan. (@anol_cebu sa Twitter)