SUPERBALITA CEBU

Nalzaro: Mag-Pit Senyor lang gihapon!

Saksi

KON nadayon pa unta ang Sinulog 2021 karong adlawa, kagahub ug saba-saba sa banda ang atong madunggan karon sa mga kalsada ning dakbayan uban sa mga kiay-kiay ug sadsad sa contingents nga mosalmot sa tinuig nga grand parade. Mga mabulokon unta nga dayan-dayan sa mga kalsada nga maagin sa parada ang atong makita. Mabagang duot unta sa katawhan nga maikugon nga mosaksi sa parada ang atong makita sa kadalanan. Apan gumikan kay kanselado man ang tinuig nga kalihukan gumikan sa pandemya, mao nga nagmingaw karon ang tibuok siyudad.

Tinuod, haw-ang karon ang atong pagbati nga di makasaksi sa mabulukon nga kalihukan nga maoy sagad natong makita matag ika-tulong Dominggo sa Enero sulod na sa 41 ka tuig. Apan mas atong gipalabi ang pagprotihir sa panglawas kay sa kulturanhong kalihukan mao nga gikanselar ug giuktaba. Para nako mas maayo ang desisyon kay sa magbasol sa kaulahian.

Kon atong nasalindot ug nakanselar karong tuiga ang rehilyosong kalihukan nunot sa kapistahan sa Senyor Santo Niño nga alang kanako maoy labing importante sa atong hugot nga pagtuo sa Kristiyanismo, walay rason nga di usab nato mahiklin bisan karong tuiga lang ang kulturanhong kalihukan. Bisan man gani ang matag adlaw nga nobenaryo sa Basilica Minore Del Santo Nino gipahunong sa mga kaparian ang linawas nga misa. Virtual o on line na.

Kay samtang dako ang atong pagtuo sa Labaw’ng Makagagahum diin atong gisalig ug gisandig niya ang tanan, apan mag-unsa man kanang pag-ampo kon dili nato ubanan sa pagbantay alang sa atong panglawas. Anaa kanunay kining kagaw nga nagdala aning Covid 19. Kon pag-ampo lang ang atong kasaligan, nganong natakbuyan man ang kaparian, mga kardinal nga kanunay man na silang mag-ampo? Buot ba natong sabton nga wala gidungog ang ilang mga pag-ampo?

Nganong ang Santo Papa mismo nga mao ang pinakataas nga lider sa Simbahang Katoliko naglikay pinaagi sa pagsul-ob og facemask kon moatubang siya sa publiko. Nganong nagpatusok man siya og vaccine nga kanunay man siyang nag-ampo? Matod pa sa panultihon nga ‘nasa tao ang gawa, nasa Diyos ang awa.’ (bobbygnalzaro@gmail.com)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!