USA sa panaway karon sa mga kritiko ni Presidente Rodrigo Duterte mao ang pagpalit unya sa nasod og mga bakuna gikan sa China. Giingon ra ba nga 50 porsyento ra ang ka epektibo sa mga bakuna gikan sa China base sa mga pagsuway sa South America diin gipahigayon ang human trials.
Nag target ang Pilipinas og 148 milyunes nga doses sa coronavirus disease (Covid-19) vaccine. Hinuon, daghang mga local government unit (LGU) ang nag-budget na og pundo alang sa pagpalit. Kasagaran sa mga LGU nag target og 70 porsyento sa ilang populasyon nga mabakunahan.
Gilalisan kon nganong mamalit og bakuna sa China, nganong di man sa Europe o Amerika, nga di man diay kini masaligan?
Sa di pa lalisan ang pagpalit og bakuna, di kaha angay unahon kon duna bay kapabilidad nga giandam ang kagamhanan alang sa storage kun kahipusan niini. Pipila lang ra ba ka mga dapit ang naay kapabilidad sa storage nga gikinahanglan aron magpabiling epektibo ang mga bakuna.
Naa na bay sistema nga giandam ang kagamhanan alang sa mas hapsay nga pagpamakuna ngadto sa labing suok nga sityo? Gikinahanglan ang hapsay ug organisadong pagpamakuna aron way mahabilin bisan usa sa populasyon.
Samtang giandam pa o umaabot pa ang mga bakuna, mas maayo nga hingusgan sa kagamhanan ang information drive sa ka importante sa pagpabakuna ug unsa ning matanga sa bakuna. Angay ba kining kahadlukan o di?
Kining mga butanga maoy angay unahon kay dako kini og ikatabang sa malampuson ug epektibong pagpamakuna aron hingpit nang mahibalik ang nasod ngadto sa daan nga normal. Ang tanan nagdepende sa pagpangandam sa kagamhanan ug unsaon pagwagtang ang negatibong mga pagtan-aw.
Inay mosakay ang kagamhanan sa negatibong mga pamahayag sa mga kritiko, sugdan na niini ang pagpangandam ug information campaign. Kita naglalis pa,ang ubang nasod namakuna na.