ANAA na sa 3,082 ang kinatibuk-ang ihap sa mga kumpirmadong kaso sa coronavirus disease (Covid-19) sa Cagayan de Oro human nagpositibo sa Sars-CoV-2 ang 13 ka mga residente sa dakbayan.
Sumala ni Acting City Health Officer Dr. Lorraine Nery, sa 13 ka mga bag-ong mga kaso, usa niini locally stranded individual (LSI), duha ang patay, tulo ang mga lokal nga authorized persons outside residence (Apors) ug pito ang mga local index nga mga kaso.
Sa 3,082 nga kinatibuk-ang kaso sa Covid-19 sa syudad, 417 ang mga returning overseas Filipino workers/locally stranded individuals (ROFs/LSIs) ug 2,665 ang mga local transmissions.
Matud ni Nery, sa 2,665 nga mga local nga kaso, 182 ang mga persons deprived of liberty, 1,363 ang mga local index cases, ug 1,122 ang mga local cases with link.
Ang Cagayan de Oro naay 337 ka mga active cases, 99 niini na-admit sa Northern Mindanao Medical Center ug uban pang mga ospital sa syudad, 225 ang mga outpatients, ug 13 ang mga ROFs/LSIs.
Nakatala usab og 14 ka mga Covid-positive nga mga kaso nga karon naka-recover. Anaa na karon sa 2,586 ang ihap sa mga nakarekober nga mga kaso sa dakbayan.
Sa maong numero, 294 ang mga LSIs, 109 ang mga ROFs, ug 2,183 ang mga lokal nga kaso (community: 1,838; Apors: 345).
Ang ihap sa mga namatay sa Covid-19 sa syudad naa na sa 159.