Daghan gihapon ang nagtuo nga ang pagsikad sakay sa biseklita sayon ra. Pareho ra ta, mao sab na ang akong pagtuo dihang nisugod kog sakay sa akong mountain bike mga 10 ka tuig na ang milabay. Hinuon nakabantay na ko ani dihang akong gidala ang akong unang mountain bike sa balay. Laliman ka kapin sa usa ka oras ang akong sikad gikan sa SunStar padung sa amoa nga mga 10 kilometros lang ang kalay-on kay nagsige ko og pahuway.
Ang akong mga kauban sa SunStar nitambag nako nga before ko magtuon sa pagtungas, anha lang una ko sa patag magsikadsikad ug i-familiarize ang biseklita. Buot ipasabot nga akong tun-an ang pangambyada.
Di ba dunay gears ang mountain bike? Sagad sa 26 dunay 3 ka rings sa front or kon di man gani, duha lang. Sagad sa 27.5 ug 29er nga MTB tag usa lang ka ring sa front. Mas di komplikado, simple ra.
Nganong importante nga imong tun-an ang pangambyada? Kay dako kaayo ni og ikatabang sa imong pagsikad kon magpabukid ka na. Kon magtungas ka, kinahanglan kang mag-change og gear, gikan sa bug-at ngadto sa gaan. Unsaon nimo pag shift sa imong gustong gearing kon di ka kahibawo unsaon sa pagkambyada? Magpataka ka na lang.
Imong mabantayan nga ang atubangan nga rings, magkadako, magkagahi while sa likod, magkadako, magkahumok. Opposite, di ba?
IMPORTANTE
Ang naka importante sa pagkat-on sa pangambyada dako kaayo og factor sa imong pagtindak tungas sa bukid o subay sa trail. Kay kon di ka pa makat-on ani, dako kaayo ni nga babag sa imong smooth nga ride sa kabukiran.
Kon di ka man matagak o maundang og tungas, hayan maputlan ka og kadena kay mapwersa man kon ang imong kambyada pabug-at, di pagaan o nagkabuang ka og shift kay naratol.
Dihang nakahibawo na ko sa pangambyada, wa na ko mahunong sa tungas nako sa bukid. Wa na ko magsige og pahuway kay nasayop sa pag shift. Busa, kon ang imong bike naa pay at least duha ka rings sa atubangan sa iyang crank, tun-i og maayo ang pangambyada aron di ka magbasol.
AYAW OG EXPECT
Duna koy higala nga maingon tang adunahan, apan kuripot. Nagsige siya og palit og kadena kay pirmeng maputlan. Ako siyang gipangutana kon tagpila ang ang iyang kadena or chain. Kahibawo kag tagpila? Tag P170. Na shock ko.
Ako siyang giingnan nga pinaka barato nako nga chain, daghang katuigan na ang nanglabay, P500. Nagkadugay, di na moubos sa tag P1K ang presyo sa akong gipamalit nga kadena.
Human siya nipatuo sa akong tambag, wa na siya maputli og kadena sa mga ride.
Ayaw pagtuo nga mas barato, mas lig-on. You always get what you pay for lagi. Kana kay barato, dako ang purohan nga gabok o di kaayo maayo og quality.
Sa sunod, ayaw pagdaginot kay mas gasto ang magdaginot sa presyo. Kay magsige ka na man og palit. Mas makadaginot ka kon ang imong paliton pulido.