Dili nato ikalimod nga kon ang team adunay Big 3 dako gyud kaayo og bintaha sa tapad.
Mao nga dihang nakuha sa Brooklyn Nets ang three-time scoring champion nga si James Harden gikan sa Houston, daghan ang nanglantaw nga mao na kini ang higayon nga ilang maangkon ang kampiyonato.
Tiaw mo bay si Harden maou ikatimbang nila ni Kevin Durant ug Kyrie Irving nga pulos nalakip sa mga nag-unang superstar sa NBA.
Sama sa nahitabo sa dihang mitapon si LeBron Jame ngadto sa Miami Heat aron paghulma og Big 3 uban nila ni Dwyane Wade ug Chris Bosh.
Epektibo ug nagmabungahon ang maong kombinasyon nga mihagdaw og duha ka titulo sulod sa upat ka sunodsunod nga finals appearance.
Laing ehemplo mao ang pagbalhin usab ni Durant ngadto sa Golden State Warriors aron pagpakigduyog usab nila Stephen Curry ug Klay Thompson nga mibunga usab og pagpalabni og mga kampiyonato.
Kini maoy igong rason kon nganong daghan ang nangagpas nga maingon ani usab ang dagan sa Nets.
Pero sa sitwasyon sa Nets, daghan pang mga pangutana kon mahimo ba usab kini nila?
Kon atong hisgutan ang sa Heat, sa pagtapon ni James sa Heat nahan-ay na ang ilang tagsa-tagsa ka mga papel.
Bisan tuod og si Wade maoy nailang lider sa Miami, apan iyang gihatag ang katungod niini ngadto sa iyang suod nga higala. Iyang gipaubos ang iyang garbo aron paghatag og katumanan sa ilang damgo. Yano ra usab nga misuporta si Chris Bosh.
Kabahin sa Golden State, gihangop usab ni Curry ug Thompson ang presensiya ni Durant. Sa pagtuo nga kini dakong tabang sa ilang team, sila nakig-ayuda alang sa ilang kalampusan.
Makahimo ba kaha usab si Durant ug Irving niini? Dili problema ang panagkuyog og balik ni Durant ug Harden kay aduna na man silay kasinatian sa matag usa sa dihang nagkauban sila sa Oklahoma City Thunder.
Pero dunay mga pagdudang migimaw kon magkasinabot ba kaha ni si Irving ug si Harden. Dili sa tanang higayon nga ang panaghugpong sa abilidad maoy basehan sa kalig-on sa team kon dili ang chemistry ug ang pagsinabtanay sa matag usa maoy labing importante sa tanan.
Sa laktod nga pagkasulti, ang batasan ug kinaiya mao gyuy pirme mopatigbabaw.
Si Harden sa iyang pagpakigkauban ni Chris Paul ug Russel Westbrook sa Houston wa pa gani makahagdaw og titulo, nabungkag lang usab dayon. Sa ato pa, dili siya pasensiyado ug nagpabilin nga way titulo.
Wa gani niya hatagi og igong higayon ang iyang pagpakigkauban ni John Wall ug DeMarcus Cousins.
Si Irving, sa iyang bahin, naglampuson sa iyang pagpakigkauban ni LeBron James human sila molangkat og titulo ubos sa Cleveland Cavaliers. Apan wa magdugay ang ilang panag-uban sa rason nga si Irving lang ang nasayod.
Nitapon siya sa Boston Celtics apan sa dali ra usab kaayo nga panahon. Karon anaa na usab siya sa Nets nga nagpabilin nga lisod sabton kon unsa gyud ang iyang direksiyon.
Wa pa gani ka plastada og maayo sa team, apan gisungog na siya sa sunodsunod nga kontrobersiya.
Sa laktod nga pagkasulti, kon ang usa sa tulo ka Big 3 dili gani makasagop sa mga ehemplo nga atong gisaysay sa unahan, kini maoy dakong disaster sa team. Timan-i ni akong gisulti. (jun.migallen22@gmail.com)