GIANUNSYO ni UFC star Connor McGregor nga preparado na ang iyang kampo sa pagpahigayon sa gikaintapan nga boxing bout batok ni Senator Manny Pacquiao karong tuig 2021.
Kini bisan paman kon adunay nagsingabot niyang away ibabaw sa octagon ug rematch batok ni Dustin Poirier sa hinapos sa buwan sa Enero nga maoy labing una niyang away human sa technical knockout nga kadaugan usa na katuig ang nakalabay batok ni Donald Cerrone.
Nagsugod og bukal ang huhungihong sa umaabot nilang awaysa Oktubre sa niaging tuig human si Pacquiao nipirma sa Paradigm Sports Management nga maoy kompaniya nga nag-promote kang McGregor ug gituohan sa fans nga dali ra mahitabo ang sukmagay tali sa duha.
Ang big boss sa Paradigm nga si Audie Attar niingon sa niaging buwan nga gusto sa iyang manok nga motilaw sa kumo sa Pinoy karong tuiga.
“He wants to fight Manny. Manny’s come out and said he wants to fight Conor. As I’ve stated publicly before, we’ve had conversations,” padayag ni Attar.
“That is a fight that we’re definitely going to make because both fighters want it, and there seems to be interest from the fans all around the world,” dugang niya.
Ang komentaryo ni Attar mao sab ang baroganan sa Irishman kinsa padayon karong nag-ensayo didto sa Dubai para sa iyang pagbalik sa UFC.
“I know the talks are intensifying for this year.So I am excited for a Manny Pacquiao bout, and it’s looking like it will take place this year. What time this year, I’m not sure,” butyag ni McGregor.
Si Pacquiao sa iyang bahin nagpanikad na nga mobalik og saka sa ring ug human kang McGregor iyang isunod si Errol Spence Jr sa Amerika. (PAC)