USA ka foreman nga number 1 most wanted person sa Tagbilaran City, Probinsiya sa Bohol nadakpan sa kapulisan sa Miyerkules sa ala 1:05 sa hapon, Enero 14, 2021 sa Barangay Sua, Inabanga, Bohol.
Si Danilo Añosa, usa ka foreman sa construction, gidakop pinasikad sa warrant of arrest nga giluwatan sa korte sa kasong rape.
Nisikop kaniya mao sila si Police Colonel Salvador T. Alacyang, hepe sa Anti Kidnapping Group-Visayas Field Unit ug mga sakop sa Provincial Intelligence Branch (PIB) sa Bohol Police Provincial Office.
Si Police Executive Master Sgt. Zosimo Ravanes Jr, sa AKG-VFU7 nagkanayon nga si Añosa dunay warrant of arrest nga giluwatan ni Judge Leo Moises Lison, presiding judge sa Regional Trial Court (RTC) Branch 3 sa Tagbilaran City.
Way piyansa nga gitugot ang korte alang unta sa temporaryong kagawasan ni Añosa.
Siya giakusahan nga nilugos sa babaye nga kuwang sa pangisip nga ilang kaabag niadtong Agusto 2020. (GPL)