SALESMAN ug iyang driver gibinaklid sa paggapos sa mga tulisan Biyernes sa alas 8:50 sa gabii, Enero 15, 2021 sa Yakult Center, Barangay Basdiot, lungsod sa Moalboal.
Mga biktima giila sa kapulisan nga sila si Alfredo Amoran Jr, 29, dunay kapuyo, taga Buhisan, Dakbayan sa Sugbo ug si Joshua Ygot Astillero, 22, ulitawo, salesman, taga Brgy. Libjo, lungsod sa Tabogon, amihanang Sugbo.
Si Police Staff Sergeant Alfredo Rosal sa Moalboal Police Station nga nahinabi sa Superbalita Cebu nagkanayon nga wa mailhi sa mga biktima ang duha ka mga tulisan.
Ang mga biktima nihulagway sa duha ka mga tulisan nga nagsul-ob sa bonnet, naka-helmet, pulos nagdalag armas.
Matod ni Rosal nga ang mga biktima diha sa sulod sa Yakult center office padulong na nangatulog.
Ning-abot ang duha ka mga tulisan, ilang gipugos pag-abli ang roll-up door dayon ningsulod, ningti-on kanila og mga armas dayong mando sa paghapa.
Ang mga tulisan nga nagdalag packaging tape nibinaklid kanila sa paggapos.
Nadala sa mga tulisan ang cash P103,000 nga halin, cellphones ug personal nga P5,000 sa mga biktima.
Wa na masuta sa mga biktima asa padulong ang mga tulisan sa ilang pagsibat sakay sa usa ka motorsiklo.
Gihulagway ni Rosal ang center nga gamay ra nga edipisyo apan dunay parking area.
Matod ni Rosal nga nagtuo ang mga biktma nga suhito sa dapit ug routine ang mga tulisan kay nasayod sa gidak-on sa kwarta nga ilang madala sa mao nga adlaw.
Usa usab sa duha nakamay-ong sa tingog sa usa sa mga tulisan.
Nahibaw-an na nianang buntag ang tulis human moabot ang kauban nila ni Amoran ug Ygot nga mao na say mitangtang sa ilang mga gapos.