DUGANG 30 ka modern public utility jeepneys (MPUJs) units nga gipanag-iya sa Lahug Apas Transport Cooperative (LATRANSCO) nagbiyahe na sa kadalanan sa Dakbayan sa Sugbo human ang kooperatiba nilusad sa dugang units niadtong Huwebes, Enero 14, 2021 sa Ecotech Center sa Barangay Lahug, Cebu City.
Si Land Transportation Franchising and Regulatory Board (LTFRB) Eduardo Montealto niingon nga dugang units ang nagbiyahe sa Apas-Carbon.
Siya niingon nga sa una, ang Latransco nag-operate sa tulo ka MPUJ units sa Lahug-Apas-Carbon vice-versa nga rota.
Sa pagkakaron, siya niingon nga mga 320 na ka MPUJ units ang gipanghatagan og provisional permits nga maka-operate sa Cebu.
Ang provisional permit renewable human sa 90 ka mga adlaw samtang ang transport cooperative o korporasyon mahimong isyuhan og prangkisa sud sa pito ka mga tuig kon sila makakompleto na sa ilang tanang mga sakyanan.
“Every two weeks naay muabot (additional). Duna ta’y expected 50 more MPUJ units by Jan. 20. Naa pay additional 100 units sa Cebu People’s Cooperative ongoing ang pagbuhat og provisional permit,” sulti niya sa SunStar Cebu. Matod ni Montealto nga 20 porsyento lang sa traditional PUJ operators ang wa pa magtipon aron sila mamahimong transport cooperative o korporasyon isip tipik sa rekisito sa Public Utility Vehicle Modernization Program.
Ang deadline alang sa PUJ operators nga mag-consolidate ngadto sa kooperatiba o korporasyon gilugwayan gikan sa Disyembre 31, 2020 ngadto na sa Marso 31, 2021. (WBS)