WAY nakitang dautan ang city epidemiological and surveillance unit officer sa dakbayan sa Lapu-Lapu, Grace Mary Carungay, sa mikatap nga mga hulagway sa social media kalabot sa iyang pagselebrar sa iyang birthday niadtong Enero 12, 2021.
Kini gumikan kay sumala pa niya wa siya mangimbitar og laing mga tawo bisag kinsa atol sa selebrasyon, gawas lang sa mga kabanay ug kauban sa trabaho nga seguradong way coronavirus disease (Covid-19).
Reaksyon kini ni Carungay sa Facebook post sa Lapu-Lapu Untold Stories nga nagpakita sa mga hulagway sa iyang birthday nga gipatugbaw nga nakalapas sa mga health protocol ang mga nanambong.
Si Carungay niingon nga kabanay lang ang iyang bisita sa iyang habig ug habig sa iyang bana ug mga kauban niya sa contact tracing team sa Lapu-Lapu City Health Office ang nanambong, matod niya dihang nahinabi sa Superbalita Cebu sa Sabado, Enero 16, 2021.
Diha ra usab kini ipahigayon sa tugkaran sa iyang balay.
Gibutyag ni Carungay nga moabot sa 50 ka tawo lang ang mitambong sa selebrasyon ug gisunod usab nila ang minimum health protocol. Kampante ra usab siya sa iyang mga kauban sanglit regular sila nga nag swab test sa kaugalingon isip mga contact tracer sa Dakbayan. (GCM)