SUPERBALITA CEBU

12 ka doktor gisikop sa pulis

CURFEW NA: Mga pulis sa Cebu City Police Office (CCPO) nakaabot ning mga doktor nga nag-inom gawas sa usa ka resto bar sa Barangay Banilad sa oras sa curfew sa Sabado sa kaadlawon. / BENJIE B. TALISIC

MOABOT ngadto sa 166 ka mga tawo ang nangadakpan sa Cebu City Police Office, 12 kanila mga doktor nga apil unta sa authorized persons outside of residence (Apor), apan nakalapas sa curfew ordinance kay nag-inom sa usa ka bar.

Ang 12 naabtan sa mga pulis nga nag-inom atol sa pagpatuman sa Oplan Bulabog sa Barangay Banilad, Dakbayan sa Sugbo sa Sabado sa kaadlawon, Enero 16, 2021.

Ang Oplan Bulabog nga gipangulohan ni Police Colonel Josefino Ligan, hepe sa CCPO, gilusad gikan sa alas 11 sa gabii sa Biyernes hangtod sa alas 5 sa buntag sa Sabado, Enero 16, 2021. Ang 12 ka mga doktor naa sa usa ka pribadong tambalanan nag-alagad.

Matod ni Police Lieutenant Colonel Wilbert Parilla, deputy city director for operations sa CCPO, nga gipangdakop ang mga doktor bisan kon mga Apor kay nakalapas sila sa executive order ni Mayor Edgardo Labella kay nag inom sila sa gawas ug nasulod usab kini sa oras sa curfew.

“Dili man consider nga Apor ka pwede naka mag inom-inom diha sa public places. And then ang Apor you are only authorized nga mogawas during sa imohang tour of duty. Like for example kato sila ang ilang duty kutob ra let’s say kutob ra alas 8. So dapat mouli na sila sa ilang panimalay, dili na sila mag suroy-suroy para mag inom-inom,” matod ni Parilla.

Ang mga doctor gipamulta og P500 matag usa, apan gidala sa CCPO ngadto sa Prevention Restoration Order Beautification and Enhancement (PROBE) sa Barangay Tejero diin sila giproseso.

BISAN OG APOR

Si Raquel Arce, pangu sa Probe, niingon nga aron di madakpan sa curfew ug di mahasol ang matag usa, mas maayong mouli sa balay usa ka oras sa di pa ang curfew bisan kon Apor.

Kon mag-inom man, adto sulod sa balay, di sa gawas.

Si Arce niabot sa Barangay Tejero gym sa Sabado sa kadlawon tungod sa pagkasikop sa 12 ka mga doktor atol sa Oplan Bulabog.

Ang 12 nirason kang Arce nga ang ilang pag-inom sinabutan ug gusto sila mo-relax tungod sa ilang kakapoy gikan sa trabaho.

“This is a stern warning to all ha. Ang buhatan sa Probe, Ceset, atong pulis ug uban pa nga mga kauban sa trabaho estrikto gyud nga nagpatuman sa lagda sa health protocols,” matod ni Arce.

Siya nipasabot nga basta nakalapas sa balaud, bisan kon Apor, sikupon gihapon.

“It doesn’t matter nga Apor ka dili nalang sila dalhon. Dalhon gyud sila kay sa inom man sila naabtan sa curfew.” dugang ni Arce.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!