Operasyon sa munisipyo sa Bansalan balik na Enero 18

Human sa usa ka semanang naparalisa, balik na sa operasyon ang munisipyo sa Bansalan, Davao del Sur Lunes, Enero 18, 2021.

Kahinumdoman nga gimando ni Mayor Quilin Sarte ang pagpaundang sa operasyon sa munisipyo apil sa Sangguniang Bayan (SP) dihang pipila ka mga opisyal sa lungsod ug kawani dunay closed contact sa usa ka nagpositibo sa coronavirus disease (Covid-19) niadtong unang semana ning bulan.

Hinay-hinay sab nga migawas ang resulta sa mga nipailawom sa test ug nasuta nga negatibo, apan ang uban gihuwat pa ang resulta.

Sa Bansalan Karon, ang opisyal Facebook Page sa lokal nga gobyerno, gipahibawo ni Abogado Kirby Villaraiz, designated public information officer for Covid-19, nga human ang nahitabong mass testing sa mga kawani, gihimo sab ang disinfection sa tanang buhatan aron masegurong luwas ang publiko nga adunay transaksiyon sa gambalay.

Hinuon, gibutyag ni Villaraiz nga wa nay natala nga bag-ong kaso sa ilang mga empleyado hinungdan nga mobalik na ang operasyon Lunes.

Sumala sa tigpamaba nga kinahanglan gihapong imentinar ang mga precautions sa matag transaksiyon.

Di pa mahimong mobalik sa trabaho ang usa ka kawani kon wa pa migawas nga negatibo ang gihimong test kaniya. (Orlando B. Dinoy)