MINILYON ka mga tawo ang mosaksi sa Sinulog grand parade latas sa katuigan. Daghan ang maglinya sa rota sa parade. Mas daghan ang nagtan-aw sa telebisyon sa ilang mga panimaly. Mao na nga usahay magduda ta sa bana-bana sa kapulisan sa mga tawo nga nanan-aw sa Sinulog.
Apan kanselado ang Sinulog 2021 tungod sa Covid-19 pandemic.
Ang gipasundayag sa Sinulog 21 Organizers mao ang usa ka virtual show nga nagpakita sa historical overview sa pagka-umol sa Sinulog sukad sa usa ka dance festival sa 1980 hangtod nga nahimong usa ka grand festival.
Kanselado man ang physical, ang linawas nga Sinulog, apan ang virtual Sinulog nagpakita sa sinugdan sa maong festival nga mahimo nang tipik ug kabahin sa kulturang Sugbuanon.
Nipaluyo ko sa pagkanselar sa Sinulog grand parade tungod kay posible nga kini maoy mopakatap sa coronavirus diesease. Nungtan pa nga dunay bag-ong mutation sa maong virus. Unya, wa pa gyuy klaro kanus-an moabot ang bakuna batok niini.
Ang atong mga opisyales sa gobiyerno naglalis pa kon unsa man gyud nga bakuna ang atong gamiton.
Dunay bakuna gikan sa China nga ang efficacy rate 50 porsiyento ra. Dunay bakuna gikan sa Estados Unidos nga 95 porsiyento ang efficacy rate.
Ang ato lang panghinaut nga ang paliton sa gobiyerno mao kadtong bakuna nga makapanalipod kanato batok sa Covid-19. Alang kanako, bisan kon 50 porsiyento lang ang proteksyon, mas maayo na lang kay sa wa gyud.
Apan di nato kalimtan nga daghan kanato ang mahadlok sa injection. Di kini angay nga kahadlokan. Nahinumdon ko sa usa ka estorya. Usa ka babaye niadto sa doktor ug iyang giingnan nga mahadlok siya sa injection.
Matod sa doktor, aron di siya mahadlok, adto lang sa iyang lubot ang injection. Nireklamo ang babaye kay di na man ang iyang lubot ang naigo sa injection. Niingon ang doktor nga way angay nga kabalak-an kay di na man to injection.
Bitaw, angay natong hangpon ang tanan nga gibuhat sa gobyerno batok sa Covid-19.