GIMUGNA na ang Task Force (TF) Ketenanek sa lungsod sa South Upi, probinsiya sa Maguindanao alang sa kahapsay sa komunidad.
Tumong niini nga makatabang nga mapadali ang kasulbaran sa panagbangi, seguruhon ang kaluwasan sa mga molupyo ug pugngan ang dugang pagdako sa bangi ug abugon ang mga armadong grupo.
Kini maoy gisulti sa tigpamaba sa Philippine Army's 6th Infantry (Kampilan) Division nga si Lieutenant Colonel Dingdong Atilano.
Ang "Ketenanek" usa ka sinultihan o pulong nga Teduray nga ang buot pasabot kalinaw.
Namugna ang TF, sumala ni Atilano, sa gipahigayon nga Peace Dialogue sa headquarters sa 57th Infantry (Masikap) Battalion, Philippine Army sa Barangay Mirab, South Upi.
Ang TF maoy mohatag og dalan nga magkahiusa ang mga lumad, Kristiyano ug mga Muslim sa South Upi.
Makamugna og malinawon nga komunidad pinaagi sa pag-uliay sa mga naggubot nga mga grupo uban ang suporta sa lokal nga gobyerno, kagamhanang probinsiyal ug gobyerno sa Bangsamoro Autonomous Region in Muslim Mindanao samtang ang mga awtoridad magseguro sa kaluwasan sa katawhan.
Nagpasalig sab ang mga mitambong sa dayalugo nga motabang nga matapos na ang kagubot ug suportahan nila ang peace framework mechanism.
Gipangunahan ang panagpulong sa Joint Task Force (JTF) Central ug 6th Infantry (Kampilan) Division.
Mismo si 6 Infantry Division Chief ug JTF Central Commander Major General Juvymax Uy ang nagpatawag sa dayalugo gumikan sa sunod-sunod nga kagubot sa lungsod.
Kahinumdoman nga gisulong sa Bangsamoro Islamic Freedom Fighters ang komunidad sa mga lumad nga Teduray, gibanhigan ang convoy ni Mayor Reynalbert Insular ug Municipal Councilor Basit Kamid. (Edgar E. Fuerzas)