SUPERBALITA CEBU

Legal officer, konsehal nasikop sa tigbakayan

ANG municipal legal officer ug iyang igsuon nga konsehal sa lungsod sa Tuburan ang apil sa nasikop sa mga sakop sa Criminal Investigation and Detection Unit (CIDU) 7 sa tigbakayan sa Purok 1, Sitio Matnog, Barangay Putat niadtong Biyernes, Enero 15, 2021.

Nakadawat og impormasyon ang CIDU sa Cebu Police Provincial Office (CPPO) labot sa kanunay nga tigbakay sa naasoy nga dapit, hinungdan gilusad ang pagpaniid sa kapulisan.

Taudtaod na, matod pa, ang ilegal nga tigbakay sa dapit diin daghan ang modayo nga mga sugarol.

Gihulagway sa kapulisan nga naa kini nahimutang sa hilit nga dapit nga dili dali nga mahibaw-an sa mga pulis.

Human masuta nga tinuod ang nadawat nga kasayuran, dali nila nga giplano ang pagronda uban ang Cebu Provincial Intelligence Unit ug ang Tuburan Police Station.

Ang mga nadakpan giila sa kapulisan nga sila si Atty. Renan del Cerna, 45, municipal legal officer sa Tuburan, maguwang niini nga si Konsehal Arbello dela Cerna, 51, ug municipal councilor sa Tuburan.

Lakip sa mga nadakpan mao silang Alexander Mangubat, 62, taga Purok 2, Sitio Tapol, Barangay Putat; Antonio Caray, 57, taga Sitio Ilaya, Brgy. Putat; Ananias Talaugon, 57, taga Purok 3 sa Putat; Jesus Sinaloba, 66, taga Barangay Cogon; Santiago Talaugon, 55, taga Purok 1, Sitio Matnog; Allan Allego, 54, taga Purok 3; ug Edgar Arnoco, 51, taga Purok 1, Sitio Matnog, Putat.

Matod ni Police Lieutenant Colonel Rolando Barraquio, hepe sa Tuburan Police Station, atol sa pagronda, gibanabana nga moabot sa 200 ka mga tawo ang nagtigbakay.

Apan dali kini nga nakadagan human makabantay sa presensya sa mga pulis ug bugtong ang siyam lang ang nagunitan.

“More or less nasa 200 yung nakitang kasama sa cock fighting but ang nahuli siyam including the municipal councilor and the attorney,” matod ni Barraquio.

Dugang ni Barraquio nga kalapasan sa Presidential Decree 449 as amended by Presidential Decree 1602 ug kalapasan sa Section 9 sa Republic Act 11332 ug Article 151 sa Revised Penal Code.

Gipahibawo ni Barraquio nga ning panahon sa pandemic hugot pa gihapon nga gidili ang mga panagtapok labi na ang illegal nga sugal sama sa tigbakay.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph