ANG dakong kausaban sa kapistahan ni Señor Sto. Niño sa Sugbo kagahapon, Enero 17, maoy dakong hagit sa mga deboto sa pagpadayon sa ilang debosyon dili lang sa pagyukbo sa imahen, apan ang pagpuyo sa tagsatagsa ka kasingkasing sa mensahe sa Batang Hesus.
Mao kini ang dugokan sa wali ni Cebu Archbishop Jose Palma, nanguna sa pontifical mass nga nahibalik sulod sa Basilica Minore del Sto. Niño human sa taudtaud nang kapistahan nga gipahigayon sa Pilgrim Center sa atubangan sa Basilica.
Limitado lang ang gipasulod sa simbahan lakip sa hermano ug hermana mayores ug mga pari nga Augustinian.
Samtang, gihangop ni Palma ang kasolemne sa misa sa sulod sa pinuy-anan sa orihinal nga imahen ni Señor Sto. Niño ning panahon sa pandemiya sa Covid-19.
“The realization that yes, pandemic may be around, but it does not paralyze us because one who is touched by the love of the little child knows that when we realize our gifts and when we believe that our gifts are meant to be shared, then we know there is real meaning in every song that we sing: Batobalani sa Gugma. There is meaning in every exclamation: Pit Senyor!” matod ni Palma.
Kagahapon nga kasaulogan maoy unang higayon nga walay prosisyon sa kadalanan, way seaborne procession ug gihimo ang virtual-only Sinulog.
Apan matod ni Palma, ang piyesta sa Senyor nagpadayon bisan walay mga naandang kalihokan sa kadalanan.
Si Palma nagkanayon nga ang limitadong pagsulod sa pilgrim grounds ug Basilica, gamay lang hagit sa mga deboto nga dili kutob sa altar apan ang pagpuyo sa tagsatagsa ka kasingkasing sa pagtulun-an sa balaang Bata.
Matod niya, ang labing maayong debosyon mao ang pagpadayag nga ang balaang Bata usa ka gasa ug magpasalamat kita sa grasya. (JJL)