Usa ka drayber sa habalhabal gipusil sa makadaghang higayon ug nahagba sa dalan H. Labra, Barangay Guadalupe, dakbayan sa Sugbo sa Sabado sa gabii, Septiyembre 3, 2022.
Si Staff Sergeant Rey Montalban sa Guadalupe Police Station, kinsa nag-imbestigar sa kaso, niila sa biktima nga 42-anyos nga si Louie Del Castillo, residente sa Sitio Kadianoy, Barangay Sapangdaku, dakbayan sa Sugbo nga dapit sa iyang kapuyo apan lumad kini nga taga dakbayan sa Bacolod.
Base sa pasiunang imbestigasyon sa kapulisan, ang biktima gikan sa Barangay Sapangdaku padulong sa Barangay Guadalupe aron mamasahero dihang gisundan sa mamumuno nga nagsakay usab og motorsiklo.
Dugang sa imbestigasyon, ang biktima nagpakusog og dagan sa iyang motorsiklo ug nitago sa tunga sa duha ka mga sakyanan nga nag-park sa dalan H. Labra St.
Apan ang mamumuno niapas ug nihunong sa iyang nahimutangan.
Dugang sa kapulisan, gipusil ang biktima sa makadaghang higayon hinungdan nga namatay dihadiha.
Sa pag-abot sa kapulisan, ang biktima nahagba na sa dan nga wala nay kinabuhi.
Usa sa mga anggulo nga ilang gisubay mao ang krimen sa pagpanimalos sanglit dunay nakalalis ang biktima sa parking area sa mga habalhabal sa Guadalupe sa nangaging adlaw.
Samtang ang kapuyo sa biktima nga si Lea Mae Taylo, 29, nisaysay sa Superbalita Cebu nga katapusan nilang panag-uban sa hapon sa adlaw nga Sabado, Septiyembre 3, 2022, alas 2:00 sa hapon.
Naghisgot sila nga hatagan og P1,000 ang iyang manghod aron sa dugang sa binuwang bayad sa motorsiklo.
Apan pagka gabii sa Sabado sa naasoy nga adlaw, si Taylo paingon na manihapon uban sa iyang upat ka mga anak, ang tulo niini sa unang karelasyon, nakadawat siya og tawag gikan sa iyang manghud nga paadtuon sa Guadalupe ug sa iyang pag-abot, nakurat nga patay na ang iyang kapuyo.