3 nasikop sa drug-bust

TULO ka mga durugista nga anaa sa drug’s watchlist sa rehiyonal ug estasyon nga buhatan sa kapulisan, nadakpan atol sa gihimong anti-illegal drug operation sa Mambaling Police Station 11, pasado alas 3 sa kaadlawon sa Dominggo, Enero 17, sa dan B. Aranas, Barangay Duljo Fatima, siyudad sa Sugbo.

Si Police Major Dindo Juanito Alaras Jr. maoy nangulo sa buy-bust uban sa mga sakop sa Drug Enforcement Unit sa Mambaling police nga miresulta sa pagkasikop sa tulo.

Giila ni Alaras ang mga nadakpan nga sila Ben Villanueva alyas Biboy, 29, ug asawa niini nga si Brenda, 27, molupyo sa naasoy nga dapit.

Samtang lakip usab nga nadakpan ang ig-agaw niini nga si Jonelou Latayada alyas Francis, 33, ug molupyo sa maong dapit.

Atol sa drug operation, nasakmit gikan sa tulo ang 140 ka gramos sa shabu nga mokantidad sa P952,000 mil .

Matod ni Alaras, ng ilang target sa maong pagpangronda si Ben Villanueva nga gihulagway nga nalakip sa regional level high value target samtang ang asawa nga si Brenda ug ig-agaw niini nga si Lantayada ang gihulagway nga mga kaabag ni Ben sa paghatud sa ilegal nga drugas.

Ang magtiayon ug ig-agaw niini anaa na karon kasamtangang gipriso sa selda sa Mambaling Police Station samtang magpaabot pa ang dinakpan nga mapasakaan sila og kaso ubos sa kalapasan sa Akta Republika 9165. (BBT)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph