Duha ka mga tawo ang nangamatay sa managlahing mga aksidente sa dan sa lungsod sa Balamban, Sugbo.
Unang namatay mao ang usa ka lalakeng call center agent nga nagbangga sa laing motorsiklo nga gikasugat alas 3:40 sa Dominggo sa hapon, Enero 17, 2021 sa Trans Central Highway, sa Barangay Cansomoroy.
Si Philip Manuel Madrona Ticar, 24, ulitawo, taga Camella Homes, Lawaan, dakbayan sa Talisay, dead-on-arrival (DOA) sa tambalanan sa lungsod sa Balamban diin siya gidali sa pagdala.
Samtang naangol si RJ Mhatt Madrediños, 20, ulitawo, taga Brgy. Prenza, human maigo sa motorsiklo ni Ticar.
Si SPO3 Benidecto Bobilles, imbestigador sa Balamban Police Station nga nahinabi sa Superbalita Cebu nagkanayon nga si Ticar kusog nga nakapadagan sa iyang Yamaha motorsiklo subay sa Trans Central Highway.
Nawad-an siya og kontrol sa manobela dihang naputol ang kadena sa motorsiklo hinungdan nga mikawat sa pikas lane ug nabangga kang Madrediñós.
Tungod sa kakusog sa impact, nalagpot si Ticar hinungdan sa grabing kadaot sa iyang ulo nga niresulta sa iyang kamatayon.
Nabangga
Usa usab ka lalake ang namatay sa laing bangga mga alas 5 sa buntag sa Lunes, Disyembre 18, 2021 sa Sitio Bung-aw, Barangay Pondol.
Si Julious Jay Campaner Cago, 20, ulitawo, empleyado sa MAP Electrical Engineering, taga Brgy. Baliwagan, Balamban, patay nang nidangat sa tambalanan.
Nakaligis ang Mitsubishi truck bus sa Tsuneishi Heavy Industries nga gimaniho ni Felix Alfanta Baron, 38, minyo, taga Sitio Tunga, Brgy. Matab-ang, Toledp City.
Si Bobilles niingon nga kusog ang dagan ni Cago padulong sa lungsud dihang siya nikawat sa pikas lane nga gisubay sa bus.
Napasok si Cago sa bus hinungdan sa grabing kadaot sa ulo. (GPL)