Konsehal sa Carcar gipusil; sakyanan naigo

AMBUSH: Gibilin kining sakyanan sa dapit sa Barangay Valladolid diin gi­pusil si Carcar City Councilor Anthony John “Antoy” Apura. / ALAN TANGCAWAN
AMBUSH: Gibilin kining sakyanan sa dapit sa Barangay Valladolid diin gi­pusil si Carcar City Councilor Anthony John “Antoy” Apura. / ALAN TANGCAWAN

ANG Carcar City Association of Barangay Councils president ug konsehal nakalingkawas sa suway nga pagpatay kaniya sa wa mahibawing gidaghanon sa mga tawo sa alas 3:45 sa hapon, Enero 18, 2021 sa sityo Tangasan, Barangay Valladolid, Dakbayan sa Carcar.

Si Konsehal Anthony John “Antoy” Apura, kapitan sa Barangay Valladolid, gikan nikaon sa ilang tindahan sa Acacia Grill ug padung na mogawas sa parking area dihang gipusil makaupat ka mga higayon sa mga tawo nga nagsakay og itom nga four-wheel nga sakyanan.

Managlahi ang paghulagway sa mga saksi sa sakyanan. Dunay niingon nga pickup truck samtang dunay nihulagway nga Asian utility vehicle (AUV).

Si Police Lt. Col. Allan Rosario, hepe sa Carcar City Police Station nga nahinabi sa Superbalita Cebu nagkanayon nga si Apura ang nimaneho sa sakyanan, inay ang iyang kuyog nga drayber.

Padulong na siya mopauli sa ilang balay sakay sa iyang Ford Raptor pick-up truck.

Dihang nipadagan na siya aron mogawas, kalit lang nilanog ang mga buto sa armas.

Nakabantay si Apura nga sila ang gipusil hinungdan nga nihupo gilayon siya.

Ang tanang upat ka mga bala puro niigo sa windshield dapit sa driver’s side.

Kini nagpakita nga si Apura ang target sa mga mamumuno nga daling nakasibat padung sa norte.

Si Apura nakakamang sa iyang tinguha nga di maigo.

Matod ni Rosario nga ang mga gunman nag-atang nga molakaw si Apura.

Nabantayan ang sakyanan nga nagtambay mga 20-30 metros gikan sa sakyanan ni Apura.

Si Rosario nagkanayon nga ila pang subayon ang mga impormasyon nga ilang nakuha.

Ilang susihon ang CCTV camera sa lugar nga wa pa nila mahiling kay dunay password ang computer diin gi-save ang footage.

Matod ni Rosario nga gamay ra ang ilang nakuhang impormasyon ni Apura kay naa pa sa kahadlok.

Ila kining gihisgutan kalabot sa usa ka kaso sa fraternity diin siya miyembro niadtong 2001, apan gisalikway kini ni Apura isip motibo.

Gawas niini, wa pay nakita ang kapulisan nga motibo sa pagsuway og patay kang Apura.

NANGHAGIT

Niadtong 2016, si Apura ni-post og hagit ni bisan kinsa nga makapamatuod nga siya ug ang iyang amahan, si Bise Mayor Nice Apura, kinsa incumbent mayor niadtong higayuna, nga duna silay kalambigitan sa illegal drugs.

Nitanyag sab siyag ganti nga P20,000 kon kinsa ang makapamatuod nga siya nadakpan sa illegal drugs, apan nahilom lang.

Ang Superbalita Cebu nisuway sa pagkuha sa habig sa konsehal, ni Bise Mayor Apura ug Mayor Mercedita Apura, apan sila pulos nibalibad kay nagpadayon pa ang imbestigasyon.

Gihatagan na sila ni Rosario og police security detail tungod sa hulga.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph