NAANGKON ni Brgy. Ginebra Gin Kings guard Stanley Pringle ang Best Player of the Conference (BPC) award sa 2020 Philippine Basketball Association (PBA) Philippine Cup.
Ang pasidungog nagsilbeng dugang adorno sa paglangkat sa Gin Kings sa Philippine Cup title nga gidominar sa San Miguel Beermen sa miaging lima ka mga tuig. Gibuhian ang pasidungog pinaagi sa virtual awarding ceremony nga gipasalida sa TV 5 sa miaging gabii.
Nalupig ni Pringle sa inilugay ning maong pasidungog ang ubang lig-ong mga kandidato nga sila si Calvin Abueva ug Matthew Wright sa Phoenix Fuel Masters, RR Pogoy ug Bobby Ray Parks sa TNT Tropang Giga.
Sila si Pringle, Abueva ug Wright pulos nasulod sa Elite Five kauban sila si Japeth Aguilar sa Ginebra ug Poy Erram sa Tropang Giga.
“Just like the others said just being nominated was a blessing. It’s really hard to pick a winner. All are deserving. I’m now looking forward to playing the next conference hard,” matod ni Pringle nga napatik sa www.pba.ph.
“I’m not really looking to make the stats but help my team win. Shout out to my teammates. This is their award too,” Pringle added.
Sa ubang mga pasidungog, si Aaron Black sa Meralco Bolts maoy midaog sa Rookie Award, si Prince Caperal sa Ginebra maoy Most Improved Player samtang ang laing sakop sa Ginebra nga si Scottie Thompson maoy midaog sa Sportsmanship award. (ESL)