Roldan: Asa na ang kalendaryo?

KATUNGA na sa bulan sa Enero apan hangtud karon wa pa'y bag-ong kalendaryo nga akong nadawat. Kamo ba diha naa? Sa niaging tuig, nagbaha ang kadaghan sa dagko ug gagmay'ng kalendaryo sa balay. Ang uban gigamit na la'g panghanig sa lamesa o pangtrapo sa hugaw. Ang uban kay wa pa maabli hangtud naabtan na lang sa sunod tuig.

Sa tinuoray, mahal ang pagpahimo og nindot ug dekalidad nga kalendaryo. Ang mga higanteng kompaniya kaniadto naggahin og dakong pundo aron magpahimo'g nindot nga kalendaryo nga ipang-apud-apod sa ilang kustomer.

Ang uban kay mag-hire pa'g modelo nga artista sa ilang produkto sa pangandoy nga mas modako ang ilang kita sa sunod tuig. Apan nausab ang panahon karon nga niabot ang Covid-19 pandemic. Niminus ang tanang negusyo ug daghang mga trabahante hasta ang mga overseas Filipino workers ang nawad-an og trabaho.

Apil sa nangaigo ang negusyo sa mantalaan ug printing press. Gani ang atong mantalaan kaniadto daghan pang pahina apan karon nigamay tungod sa pagminus sa nagpa-advertise sa ilang produkto ug serbisyo.

May duha ako ka kaila nga tag-iya'g printing press nga nangita'g buyer sa ilang "state-of-the art" nga makina nga offset ug tarpaulin printer kay wa'y nagpatrabaho kanila.

Apil sa kompetensiya sa mga printing press ug mantalaan ang social media nga bisan asa, bisan unsang orasa basta naa kay load ug linya sa internet, makakuha ug makabasa ka sa mga lab-as nga balita. Makita pa nimo ang aktuwal nga panghitabo diha-diha dayon. Dili parehas sa mantalaan nga ang gipaguwa nga istorya karon kay nahitabo pa kagahapon o sa niaging mga adlaw.

Limitado sab ang espasyo sa mantalaan busa dili tanang istorya ma-imprinta niini.

Apil sa kompetensiya sa printing press ang barato ug dekalidad nga gagmay'ng printer.

Sa pagkusog sa negusyo sa computer, apil nga nikusog ang pagpamalit og printer. Unsaon man pagpaguwa sa "hard copy" sa atong sinulat sa computer kung walay printer? Busa dili na ta mangutana nganong wala o minus ang kalendaryo karong tuiga? Naay pipila nga nag-imprinta apan limitado ra kini sa ilang suod nga kustomer o mga higala.

May pipila ka gas station nanghatag lang og kalendaryo sa ilang kustomer nga nagpatubil og 1 ka libo pataas. Ang uban kay nanghatag sa ilang suki ug mga fans sa ilang produkto.

Ang uban imbis nga tagsa-tagsa ang pahina matag bulan, gilumpong na ang duha og tulo ka bulan matag pahina aron makadaginot sa papel ug tinta.

Ang uban imbis colored, gi-one o two-colors na lang. Ambot kaha ang mga sala sa husgado kung nakakuha pa sila'g dagkong kalendaryo nga ipangbitay sa ilang buhatan aron dali rang makita ang sunod petsa sa gitaral nila nga kaso.

Hinuon, ang halos tanan kanato aduna may cellphone busa dali na makita ang petsa. Ang uban kay mag-imprinta sab og kalendaryo nga sila ang nagdesinyo sa ilang printer.

Mas maayo sab tingali nga wa nay dagko ug mahalong kalendaryo aron iwas sa pagputol sa kahoy aron himuong papel. Tubig na lang sab ang panglimpyo sa lubot kaysa toilet paper.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph