DAVAO DE ORO -- Nabahin ang mga opinyon ug pagtuo sa mga katawhan sa hisgutanan kabahin sa Covid-19 vaccine nga giingong sa mosunod nga mga bulan posibleng ipahigayon na ang pagbakuna sa katawhan sa tinguha mga matuldokan na ang gikalisangang sakit nga coronavirus disease (Covid-19).
Apan taliwala niini, kung duna may andam nang magpabakuna, duna say mga tawo nga way plano gumikan sa kahadlok sa posibleng mahimong epekto niini ngadto sa lawas.
Ang inahan nga si Fe Tahos, kinsa negusyante'g saging sa Purok 13, Barangay New Visayas sa lungsod sa Montevista sa Davao De Oro, nagbutyag sa dihang nahinabi sa Superbalita Davao nga di gayud siya magpabakuna kung moabot man kini sa kahadlok sa posibling mahimong epekto niini ngadto kaniya.
Ug sama sa maong inahan, ang anak sab niini nga si Anthony di sab mosugot nga mabakunahan.
Hinuon gisulti sa mag-inahan nga way nagpositibo sa Covid-19 sa ilang barangay.
Samtang ang kanhi broadcaster sa radyo sa siyudad sa Tagum nga si Ted Cabana, kinsa misalig sa administrasyong Duterte, nagbutyag nga kung imando man sa gobyerno nga magpabakuna ang katawhan, andam siya nga magpabakuna tungod sa dakong pagsalig kang Pangulong Rodrigo Duterte.
Ug sama kang Cabana, ang tag-iya ug tagdumala sab sa Alingayao Therapeutic Health and Wellness Clinic nga si Dr. Silfred Alingayao andam sab nga magpabakuna sa higayon nga naa na ang bakuna.
Dako ang pagtuo ni Alingayao nga sa higayon nga mabakunahan ang tanang katawhan, mahibalik na sa normal ang tanan.
Dugang pa niini nga way kamatuoran ug pulos lamang pagpanghadlok ang giingong epekto sa bakuna ngadto sa lawas sa tawo.
Dili matud pa tinuod ang gipakatag nga istorya nga mahimong zombie ang mga tawo nga mabakunahan sanglit anaa ang gobyerno nga andam manalipod sa katawhang Pilipino.
Nagkadaiya man ang opinyon ug pagtuo sa mga tawo, apan ang katawhan mismo maoy makadesisyon sa iyang kaugalingon kung magpabakuna ba o dili. (Dexter T. Visitacion)