NIKULIT og kasaysayan ang Sinulog Festival niadtong Dominggo nga maoy labing pinakamingaw sa tanang selebrasyon sukad ni nahimugso niadtong 1980.
Sa labing unang higayon wala say Cebu Pop Music Festival human ni gi-postpone at the last hour bisan pa og virtual tungod sa pagsaka sa kaso sa Covid.
Pero ang good news kay kadtong balikbayan nga nakit-an nga nag-positibo sa bag-ong variant sa Covid kay asymptomatic na.
Tinuod gyud tingali tong giingon nila nga bisan kon mas kusog ni siya manakod apan kining bag-ong variant nga gikan sa UK kay dili ni siya deadly o makamatay kumparar sa naunang Covid-19. Praise the Lord.
DIE-HARD KAPAMILYA
Dalaygon kaayo ang gibuhat ni Janine Gutierrez nga samtang nag-iyahay og layas ang Kapamilya stars ngadto sa ubang TV network apan nia siya maisugong nibiya sa GMA aron magpasakop sa ABS-CBN.
Tingali dunay nakit-an ang 31-anyos sa ABS-CBN nga wala sa Kapuso Network nga maoy nagtukmod niya aron mobalhin human sa siyam katuig niya sa GMA.
Apan sige lang, kay sa higayon nga makabalik na ning ABS-CBN, siguradong hayahay sad ni si Janine ug ang ubang die-hard nga wala gyud mamiya sa kasakit man o kalipay ug nagpabiling true-blooded Kapamilya.
WA NAY SUD
Nahibawo ba mo nga wala nay sulod ang opisina sa ABS-CBN-Cebu sa Jagobiao?
Ang tanan kunong mga butang hasta ang mga sakyanan gipamaligyag hurot apan ngadto ra sad sa ilang mga empleyado sa barato ra kaayo nga presyo.
Ang sakyanan nga gigamit sa ilang news team gibaligya ra kunog P30,000 hasta ang mga aircon, lamesa ug lingkuranan gipang-dispose na tanan.
Kay mas dali man gud kuno madaut ang building nga wa gamita unya dunay daghang butang sa sud mao nga halos gipanghatag na lang ni sa mga empleyado aron lang mahawan.
Ako sad nasayran nga bisan sa pagkalugi sa ilang negosyo gipabawnan sa ABS-CBN og sobra-sobra sa nalatid sa balaud ang ilang mga empleyado nga nawad-an og trabaho. Pagkanindot.
BIRTHDAY WISH
Wa lang hibaw-i padung na sad diay matapos ang buwan sa Enero. Apan karon pa ko nga daghan diay sikat mag-birthday sa Enero 22.
Sa Hollywood naglakip nilang Linda Blair (child star sa 1973 hit movie The Exorcist); Steve Perry (original vocalist sa Journey); ug Diane Lane (actress sa Perfect Storm ug Man of Steel); Sa Pinoy silang Khalil Ramos (singer); Rich Asuncion (actress); Shalala (comedian); TJ Trinidad (actor) ug Antonio Lagdameo Jr. (bana ni Dawn Zulueta).
Pero ang akong happy birthday wish is a time machine kay gusto ko mobalik sa panahon nga normal pa ang tanan ug di pa ingon ani kalisud mabuhi sa kalibutan. Di ba?