Dear Noy Kulas,
Tawga lang ko og Blue, usa ka single mother sa 5 anyos nga batang babaye. Mao ni ang akong problema karon.
Dihang nagkauyab mi sa papa aning akong anak, wa dayon ko kahibawo nga minyo siya tungod kay maora siya og ulitawo. Wa kaayo ko masuhito sa iyang background kay didto ko sa abroad sud sa few years. Mao na nga dali ra kong nailad. Uwahi na nga nahibawo ko nga minyo na siya kay mabdos na ko.
Akong gidawat nga minyo siya kay love nako siya ug lisod nga magdaku ang among anak nga way amahan nga mailhan. Sa kadugayan, akong nahibaw-an nga babaero siya, pero ako ra ang nimabdos kay ang uban nisugot ra nga iyang ipa-abort.
Didto nagsugod na ko og ka realize nga usa lang ko sa mga babaye nga iyang gigamit sa iyang need. Didto nagsugod nga magsige na mi og away hangtod nga ako siyang gibuwagan. Nasuko siya nga nakig-friend ko sa iyang asawa sa Facebook. Iyang gi-cut ang among communication tungod ani.
Nagsige gihapon hinuon siya og support sa bata. And lately, iya kong gihangyo nga magbalik mi kay di kuno siya mahimutang sukad mi nagkabuwag. Ni-threaten sab siya nga kon di ko mosugot, iyang putlon ang sustento sa bata kay puslan man nga wa na ko magtagad niya.
Ako ba siyang uyonan sa iyang gusto? Dako ang mawala sa akoa kon iyang putlon ang support sa among anak. Di pa nako makaya ang pagbuhi sa bata nga ako ra, labina nag-eskwela na.
BLUE
Blue,
Kon iyang giila legally ang bata, mapugos siya nimo sa pagpasutento kay duna ka may ikapakita nga legal papers. Kana mahimo man nga makapasaka ka og reklamo ngadto sa korte batok nianang imong boyfriend aron makaamgo na siya sa iyang obligasyon. Ang family court ang mokupot niana kon gusto kang mapugos siya.
Bisan wa siyay legal nga papel nga gipirmahan, kon duna kay mga ebidensya nga magpakita nga siya ang amahan sa bata, magamit mo kini gihapon sa korte. Wa pay labot sa mga saksi. Busa, wa na kinahanglana pang tangduon mo siya sa iyang gustong makigbalik siya kanimo.
Hinuon, estoryahe siya daan sa imong mga plano aron makaamgo siya nga mosugot ka man sa iyang gusto o di, obligado siya sa pagsustento sa bata.
Gawas pa ini, kuyaw kon ang asawa makahukom sa pagkiha ninyong duha. Naa na ra bay ebidensya nga mao ang inyong anak. Busa, magmatngon ka kay mas dako pa unya nga problema ang inyong masudlan.
NOY KULAS
Alang sa imong problema, e-mail sa kulassuper@sunstar.com.ph