Sa pagtuo sa kadaghanan o tanan nga mga Katoliko atol sa pista ni Sto. Niño niadtong Domingo, dili kapugngan ang pagsaulog ingon man ang mga dayan-dayan sama sa sayaw-Sinulog agi og pasalamat ni Sto. Niño, bisan pa sa atong giatubang nga katalagman aning Covid-19, nga daghan na ang natakdan ug namatay.

Manghinaut ko nga hatagan ta ni Sto. Niño og proteksyon labina kadtong mga tawo, lakip na ang mga batan-on nga nanimba, nagsaulog, nagkumbira, misayaw, ug miuban sa caravan sa prosesyon sa imahen ni Sto. Niño nga malikay sa Covid-19 bisan pa sa pagdili sa atong kagamhanan.

Niadtong buntag sa Dominggo, akong nasugatan sa highway sa Liloan, Cebu ang prosesyon ni Sto. Niño. Bisan tuod og nagsul-ob og mask ug nagsakay ang mga miduyog sa caravan, apan nakuyawan ko sa akong nakita kay naghuot sa sakyanan ang mga tawo. Di ba ang social distancing di man lang sa mga mall ug simbahan, lakip man niini ang mosakay sa mga sakyanan?

Ang atong pagtuo inubanan sa pag-ampo nga maluwas ta sa mga kadautan sama niining Covid-19, nga tibuok kalibutan ang naapektohan, usa ka dakong tabang sa akong kaugalingon nga kahilwasan apan kinahanglan usab nga atong duyogan sa pagtuman sa mga health protocol nga gimando sa kagamhanan.

Di man tingali ta mahingawa kay karon ra man nga higayon nga wa makapasundayag ang Sinulog Foundation Inc. (SFI) sa Sinulog showdown kun indigay sa sayaw. Gani, sa miaging Enero bisan pa kon nahibaw-an na nga dunay virus nga namatikdan sa Wuhan, China gipadayon gihapon ang Sinulog showdown ug naandan nga kalihokan sa Basilica del Sto. Niño atol sa Pista Senyor.

Gani, bisan pa sa pagdili sa kagamhanan sa mga kalihokan sa simbahan ug SFI nga makatawag og atensyon sa daghan tawo, duna man gihapoy mga kalihokan sa pagsaulog sa pista ni Sto. Niño. Si Gov. Gwen Garcia uban sa iyang mga sakop nagpasundayag og sayaw-Sinulog diha sa Kapitolyo agi og paghalad ug pasalamat sa atong bata nga patron. Gipakita ni Gobernador Gwen ang iyang hataas nga pagtuo ni Sto. Niño.

Niadtong sayo sa gabii sa Dominggo, dunay kusog ug lanog kaayo nga tokar sa disko, nga di layo sa among dapit nga nahingangha ko tungod kay base sa akong nahibaw-an gidili pa man sa atong kagamhanan ang disko. Mitawag ko sa telepono sa Talamban police station apan di ko makasulod. Nagtext ko sa Cebu City Police Office (CCPO) sa 09173057699 ug Talamban police station sa 0922219459 aron pagpahibawo sa maong kalihokan apan wa ko gitubag. Basin og way load ilang cellphone.

Niadtong Sabado, Enero 16, nakatala og 56 ka bag-o nga kaso sa Covid-19, matud sa bulletin sa Department of Health, Central Visayas. Sa sama sa nga taho, miabot na sa 570 ang aktibo sa kaso sa Covid-19 ang sa Dakbayan sa Sugbo, 81 sa Dakbayan sa Lapu-Lapu ug 100 sa Dakbayan sa Mandaue. Mga abay, atong ipadayon ang atong pagmatngon!